ZPM Steering Committee rorel \hukhawmna hi an pawl Chairman, Pu Lalliansawta’n a kaihruai a, Chief Minister Pu Zoramthanga’n “Ramri hi a sawia sawifel chi a ni lo, a chinfel dan tur an hre ru a, tuna sawi chi a ni lo” a tih chu a chinfel hun an nghahhlelh thu leh a sawia sawi fel chi a nih loh chuan a tihin ti fel thuai se an ti a, ramri buai chungchangah MZP-in political party te’n political advantage lak an hlauh vanga party te inrawlh lo tura a duh agin tun hnaia Vairengte daia buainaah ZPM MLA te a hmunah an kal lo chu an fakawm a ni an ti a. Vairengte daia Assam Forest-in kut an rawn thlak chu MZP duh dan anga a rang thei ang bera titawp tur leh Zophai hmuna Pu Ch. Chhunga leileta chawlhbuk sak thuai a nih theih nan Mizoram sorkar chu hmala tura an phut thu te, tun hnaia MPSC in hna a lak tura interview an koh tawh sorkarin a tihtawp sak chu an dem thu leh a rang thei ang bera MPSC chu interview kaltlangpui tir tura an duh thu te, Mizoram sorkarin Education department hnuaia 4th Grade hnalak tur written test kaltlanga lak a tum mek laia, a aia hna sang zawk zirtirtu written test nei lova lak a tum lawi si chu mak an tih thu leh written test kaltlang ngeia zirtirtu hna hi lak nise an duh thu te an sawi.
Kumina Mizoram hmun hrang hranga sawhthing chingtuten hlawk taka an thlai thar an hralh thei chu an lawmpui tih ZPM hian an sawi a. Hei hian nikum Assembly inthlan dawna, ZPM Manifesto pui ber zinga mi sawhthing Kg. khat Rs.50-a lei an tum thu an sawi chu a theih zia a ti lang chiang hlea an ngaih thu Resolution an pass ah an tarlang a ni.
