He thu hi vawiina an pawl chhung inkhawmah sawiin, Pu F. Rodingliana chuan, Pu R. Lalzirliana’n Congress Party a chhuahsan chuan Congress Party chu awmna tlak a ni lo tih tilangtu a nih avangin ZPM tan Pu R. Lalzirliana chu a hlu hle niin a sawi. ZPM Senior Vice Chairman chuan, MNF party chu mipuiten eirukna nen an la hmehbelh avangin an tan tlin ngaihna a awm lo niin a sawi a, MNF hotute hian vawiin thlengin thu belhchian dawl lo sawi an la ching a, tun hnaiah pawh an President berin n sorkar chuan mipuiten vai buhfai an ei loh tur thu a sawi nia sawiin, hei hi thil theih loh a ni a, a chhan chu Sorkar laipui Policy anih avangin kal san ngawt theih a ni lo niin a sawi.
Pu F. Rodingliana chuan, an pawl hian ramhluizia angin mithar an lawm lut ngai lo niin a sawi a, hetiang hi ni mah se, ni tin mithar an nei reng a, memberhip fee an lak ve loh avangin an khingpuite hian tlem anga lantir an tum nia sawiin, a nihna takah chuan ZPM hi Party te an ni lova, an thawh ho tirhah ZNP ringawt pawhin bial 38-ah vote 99,916 an hmu a, MPC pawhin vote sing 5 vel an nei a, a belhtu pawl dang neuh neuh an awm bawk avangin pawl lian tak an ni tih ZPM Senior Vice Chairman chuan a sawi.
He inkhawm hi ZPM General Secretary, Pu C. Lalvuana’n a kaihruaia, Caucas member, Rev. Darchungnunga’n thu a sawi bawk.
