ZPM Legislature Party Leader-in Mizoram sum dinhmun leh Covid 19 hri leng do nana Mizoram sum dinhmun puanzar a tul thu a sawi chhanga, Chief
Minister, Pu Zoramthanga’n “Pathian chauh lo chuan tumahin a hriat theih loh” tia a chhang pial ringawt chu mipui tan a lungawithlak loh hlea an hriat thu an sawi a. Finance changtu Chief Minister chu tuna Mizoram sum dinhmun sawi thei tur a nih thu leh a hmanna tura ruahmanna pawh a sawi thei ngei tur a ni an ti a, a sawi duh lo a nih chuan “Ka sawi duh lo,” ti mai se, Pathian hming chhala sawi pial dan kawng zawn ngawt chu sum chabi kawltu
rinawm tihdan turah an ngai lo tih ZPM hian an sawi.
Assembly Speaker hova MLA-te thukhawmin an rel anga MLA Local Area Development Fund atanga kum khatah cheng nuai 50 thawh a nih chuan cheng nuai 2,000 a tling dawn a, an hlawh atanga zaa 30 an thawh tur pawh cheng nuai 2,076.8 a tling dawn tih ZPM hian an sawi a, hetianga sum hmanna tur duan lawk pawh awm lova sum thawhkhawm ai chuan MLA fund chu mi harsaten an khaw chhunga inhlawhna atan an hman theih turin dah ni se, pawh hek sak kher loh atan tha zawkah ZPM chuan a ngai a ni, an ti a. Ram pawn lama tangkhangte hruai haw turah fimkhur a tul hle laiin, Covid 19 kai lo tura mipuite inven fimkhurna lam hlamchhiahin sum ringawt an buaipui lutuk ang tih a hlauhawm a, mahni party policy tihhlawhtlin tumna remchang an melh palh ang tih a hlauhawm tih ZPM hian an sawi.
