ZPM Party puipate nimina thukhawm chuan, tun hnaiah MLA pakhatin mipui sum, MLA Local Area Development Fund hmanga khawl a lei chu a chhawr tur mipuiten an mamawh hmanhmawh tawh viau laia sorkar-a pek luh a tum dan leh sorkar-in a lo dawnsawn danah politics-a hamthatna neih tel duhna leh hamthatna dawng an awm ang tih hlauhna nia ngaih theih thu inchuh, a dik zawk hriat harsa khawpa inpuh tawnna a awm chu pawi an tih thu an sawi a. Tun hnuah chuan ram hruaitute chu inzah tawn taka mipui rawng bawl thin turin an ngen a ni.
ZPM hian, Covid 19 hri leng Mizoram-in a hmachhawn danah, mipuite tanrualna leh thuawihna chu lawmawm an tih thu an sawi a. Hetiang hun harsa leh khirh tak kara mipui himna leh thlamuanna atana kawng hrang hranga thawktute chungah lawmthu a sawi a, hri leng hi fimkhur tak leh khauh taka do chhunzawm a ngaih ngei dawn avangin Sorkar chu lo inruahman lawk tawh thin turin an ngen tih an sawi a, ruahmanna siam thar a awm leh hunah a hautak lai bera thawktu, ramhnuaia riahchilhtute mangnghilh tawh loh nise an duh tih an sawi.
