ZPM hian, tuna Mizoram hun tawn mek chu Politics-a hlawk tum nana hman hun a ni lo a, tanrual hun a ni, an ti a. Tunah hian thla khat chuang inkharkhip a ni tawh a, Mizoram chu mahni thar chhuah hmanga innghahna tham nei lo an nih avangin a buai ber pawlah a tang mek a ni an ti a, hri leng dona atan leh chhawmdawl ngai chhawmdawlna turin mi inphal ten CM Relief Fund-ah sum an chhung khawm ruih ruih a, hetiang a nih avang hian Finance changtu Chief Minister chu Mizoram sum dinhmun dik tak sawi chiang turin an duh tih an sawi.
ZPM hian sorkarin sum a harsa a nih chuan Covid 19 chungchanga hmalakna atan bik liau liaua hman turin MLA-ten an hlawh zaa 20 aia tlem lo thawh phawt se, chumi hnuah sorkar hnathawkte chu an hlawh thawh tir ve chauh ni se, an duh tih an sawi a. Heng hlawh atanga sum tlingkhawmte hi Account hranpa siamin Covid-19 bik atan chauh hman ni se, thil dangah hman pen loh ni se. Pawisa hmanna pawh a langtlang thei ang bera kalpui ni se tih chu ZPM Legislature Party MLA te ngaihdan a ni an ti.
Covid 19 chungchangah Chief Minister-in sum hman tur chu limit a awm loh tur thu a sawi tih ZPM hian an sawi a, hetiang hi ni mah se, mipuitling chin chuan sum leh paia Mizoram sorkar a harsat zia an rin hriat vek thung a ni an ti a. Assembly Speaker pawhin a manganthlak zia hriain Thawhtanni khan Legialature party tin aiawhte ko khawmin, an hlawh atanga tanpuina thawh dan tur a sawipui a ni an ti a, a rang lama thukhawm leh tur thu dah a nih laiin Congress Legislature Party Leader, Pu Zodintluanga chuan party mal hlawkpui nana hman tuma mipui hmaah thupuan a siam a ni an ti.
