Vawiina an Party chhung inkhawmah Pu Lalduhoma hian, Central sorkar kal duh dan enin an kal zelna turah ‘ralkhel dar’ a ri a, inralrin a hun tak zet tih hi a chiang hle a, ram sum leh pai siam\hat aiin an party sawhngheh leh tih hausak lam an tuipui zawk a. Company liante nen an inthurual tlat avangin kum 2018-19 chhung ringawt pawh khan Rs. vbch. 1450 an nei hman a, hetiang a nih mek lai hian ram Economy a tlakchhiat mek thung tih sawiin, sumleh pai \hannaah Bangladesh pawh an phak ta lo a, hei mai hi ni lovin kum 45 chhunga hnathawh tur nei lo tam ber \um a thleng mek niin a sawi. Pu Duha chuan, sorkar laipui rorel duh dan chu a awpbet zawng hlir a ni tih sawiin, RTI Act leh Unlawful Activities Prevention Act an siam\haa a, mimal pawh firfiak-a puan theih an nih tak avangin Journalist thlenga nepchek an nih mek thu leh tunah CAA an tihhlawhtlin tawh avangin an tih leh tur chu a huphurhawm hle a, Uniform Civil Code leh Ram Mandir sak bakah Kristian-te tana hlauhawm ber sakhaw danga inleh theih lohna dan, Anti Version Law chu thil hlauhawm tak vek a nih avangin lo inbuatsaih lawk a \ul takzet tih a sawi. Pu Duha chuan, khua leh tui dik tak chhinchhiahna tur National Register of Citizens (NRC) chu Supreme Court remtihnaa Assam-ah kalpui a ni a, hetah hian ram dang mi nuai 19 vel hmuhchhuah an ni a, an zingah hian Hindu sakhaw betu \hahnem tak an awm avangin chung mite India-a an awm hlen theih nan CAA hi duan a ni ta tih sawiin, NRC-a tel lo State hrang hranga Muslim sakhaw betute chu Detention Centre-ah khungkhawm tur niin, heng mite enkawl zui dan tur hian ralkhel dar a ti ri-a, inralrin a hun tih a tichiang hle a. Heng boruak leng vel karah hian Mizo hnam hi engtinnge a kalz el dawn tih ngaihtuah a ngai a ni, a ti a. NRC hmanga dan lova India-a cheng hmuhchhuah an tam poh leh khua leh tui nihna pek tur an tam dawn tihn a nih avangin Mizoram hi a him dawn lo hle a, tun a\ang hian Kohhran leh Tlawmngai pawlte nen hmalak dan tur lo rel lawk a ngai a, he thil hi Politics-a inhnamhnawih duh loh avanga ngawih bopui ngawt chi a nih tawh loh thu sawiin, hetiang khawpa Mizo hnam a him loh lai hian Mizorama rorellai Party-in heng thil \ha lo hrang hrang tihpuitlin tumtute an thlawp tlat chu a pawi hle tih a sawi.
He inkhawm hi ZPM General Secretary, Pu Lalthlamuana’n a kaihruai a, Zo hnahthlak zinga mi pathumin India rama Civil mite chawimawina sang an dawn tur thu puan a ni chu chhuanawm an tih thu leh an lawmpui thu Pu Lalduhoma chuan a sawi a ni.
