Dr. Vanlalthlana hian tun thla ni 8 khan ZPM hruaitu \henkhat nen Bairabi hi an tlawh thu leh thil awmdan an enfiahna a\angin Mizoram venhim kawnga sorkar inthlahdah zia an hmu tih a sawi a, Bairabi-a Temporary ILP pekchhuah dan chu a him lo hle tih sawiin, State dang a\anga Mizoram lo lutte tan Bairabi khaw khaw tawn tirah ILP siamna hi dah a ni a, he hna thawk tur hian mimal rawih a ni a, Temporary ILP a siam a\angin hlawkna a tel a, ILP siamtute hian tun thla ni 2 a\ang khan an khawl a chhiat thu an sawi laiin, Bairabi khaw mite chuan hei aia rei khawl an hman tawh loh thu an sawi thung a. Sorkar-in Barcode nei veka ILP pek chhuah a nih thu a sawi \hin laiin, Bairabi an tlawh lai hian Barcode hi hman a ni lo tih a sawi a, ILP pek chhuah dan hi a him lo hle a ni, a ti.
Dr. Vanlalthlana chuan, Bairabi-a Temporary ILP siamna a\anga metre 10 vel leka hlaah kumin September thla a\ang khan NRC endikna siam a ni a, heta \ang hian NRC List-a tel lo mi engemawzat chu hmuhchhuah an nih thu helaia Duty-te hian an lo hrilh tih a sawi a, hetiang a nih chuan September thlaa NRC endikna siam a nih hma hian NRC list-a tel lo mi engzatin nge Mizoram lo lut ang tih a hriat loh a, tun dinhmunah Mizoramah NRC List-a tel lo hnam dang engemawzat an awm ang tih a rin theih a ni, a ti a. Hetiang bawk hian Bairabi Rel chawlhhmunah ILP endikna a awm ngei ngei tur a nih laiin, Rel chawlhhmuna ILP leh NRC endikna chu hman ni lova, rel hmanga Mizoram lo lutte chu ILP leh NRC an neih leh neih loh endik lova Mizoram an lo luh mai \hin avangin a him lo tak zet tih a sawi.
Bairabi-ah hian ramri venghim turin 1st IR Battalion Company 1 dan a ni a, Company 1-ah hian sipai 30 vel awm tur a nih laiin ramri vengtu hi mi 17 chiah an ni tih sawiin, Dr. Vanlalthlana chuan, hei hi a chhan chu an awmna tur a indaih loh vang a ni a, Congress sorkar lai, kum 2013-a Building pakhat mi 20 vel awm theihna tura sak chu a sak phung \hat tawk loh vangin hman tlak lohvin a awm a, hetiang hi ramri vengtute dinhmun a nih avangin an awmna tur buatsaih ramriah sipai tam zawk dah belh turin sorkar chu an phut tih a sawi a, Mizo te ram neih chhun veng him turin tun aia chak zawka hmalak a ngai tih chu an ngaihdan a nih thu a sawi.
Tun thla ni 3 khan Mamit District chhunga Pu K. Ramengmawia leh Pu Huapzauva leilet enkawltute chu helpawl mi nia hriatten chhuak turin an ti a, he thilah hian leilet neitu Pu K. Ramengmawia’n Mamit PS-ah FIR a thehlut a, hemi bawhzui hian Addl, SP chuan helai hmunah hian darkar 24 chhung Police duty turin thupek a chhuah a, Police duty hi dah an nih tak chuan loh avangin leilet hnathawkte chu tun thla ni 10 khan an chhuak ta nge nge tih Dr Vanlalthlana hian a sawi a, hei hian ramri-ah venghimtu dah a \ul zia a tilang chiang hle tih a sawi.
Mizoram leh Assam ramri buai avangin Mizoram chuan helai hmunah hian IR Police a duty tir a, Assam lam pawhin Assam Police, Assam Armed Police leh Assam IR an duty tir a, hetiang bawk hian Sorkar laipui pawhin CRPF bakah ram dang nena inrina vengtu BSF leh ITBP hial an duty tir tih sawiin, hetianga BSF leh ITBP Duty tir an ni hi Sorkar laipuiin Mizoram hi India ram bung khatah pawm ta lovin, International Boundary-ah a dah ta mai em ni tih chu an zawhna a nih thu Dr. Vanlalthlana hian a sawi bawk.
