Vawiina an pawl pisa hawnna inkhawma thu a sawiah Pu Lalduhoma chuan, Citizenship (Amendment) Bill, 2016 chu Mizorama dodal hmasa ber pawl an ni tih sawiin, he Bill an duh lohna Memorandum an thehluh tawh bakah Press Conference neiin an dodal thu an lo tlangaupui tawh \hin niin a sawi. Tun hnaia hmarchhak pum huapa he Bill nasa taka dodal a nih mek laia mi\henkhatin he Bill hlauhawm loh thu Social Media-a an thehdarh chu vanduaithlak a tih thu leh MNF leh Sorkar laipui inremna anga Article 371 (G)-a Mizote hung bik a nihna chuan he Bill hi a huam ve lo anga sawi chu thudik lo a ni tih sawiin, Article 371 (G) hnuaia ram neitu nihna leh ram inhlanchhawn theihna dana Tribal ni lo hnena ram hralh theih lohna dan chu inremna thuthlung siam hma, British hun lai a\anga Mizote chanvo ni sa, inremna thuthlungin a nemnghh mai a ni, a ti a. He thutlukna hnuaiah hian Nor Tribal tan Mizoramah inhmun neih theih loh a ni a, tuna Mizoram tana hnawk ber Chakma-te chu Tribal an nih avangin dan theih an ni dawn lova, Inner Line Regulation Act pawh India khua leh tui ni sa, Mizorama lo lut turte danna mai a ni a, hei hi India khua leh tui nihna lam a khawih loh avangin inhnemna tlak a ni lo tih a sawi. Pu Lalduhoma chuan, Citizenship (Amendment) Bill, 2016 chu Pass lo pawh ni se, Mizo mipuiten tih theih an nei tlem tawh hle tih sawiin, BJP kaihhruai Sorkar laipui hian ruahmanna thuk tak neiin, kum 2015 September ni 7 khan Union Home Ministry chuan thupek chhuahin Passport Act hnuaiah Bangladesh leh Pakistan-a Hindu sakhaw betu an sakhua vanga tihduhdah tuara India-a lo lutte chu hnawhchhuah loh turin a ti a. Hetiang bawk hian Foreigners Act hnuaiah kum 2014 December ni 31 hma lama India-a lo lutte chu hnawhchhuah loh tur tih thupek an lo tichhuak tawh a, hemi nemngheh nan hian tuna Citizenship (Amendment) Bill, 2016 hi siam an tum ta a ni a, hei hi dan theih a ni lo a nih pawhin Hmarchhak bial emaw, Mizoram emaw huam ve lo tura siam a nih theih nan nawr a ngai a. Panchayati Raj pawh a hmang duh state-in an hmang a, a duh lovin an hmang lo mai anga he dan hi siamrem a nih theih nan hmalak a \ul takzet a ni, a ti.
ZPM Leader, Pu Lalduhoma chuan, zu zawrh tihtawp chu ZPM leh Kohhran duh dan a ni tih sawiin, hetihrual hian tuna sorkar-in zu zawrh tihtawp nana Dry Day puang a, a pawt sei vak vak chu zu zawrh titawp tura kalphung dik a ni lo tih sawiin, zi zawrh hi an titawp duh a nih chuan dan hmanga tihtawp mai tur a ni, a ti. Pu Lalduoma chuan, nikum tun ang hunah kha chuan an pawl chu Zero an ni a, tunah chuan Mizorama a lian ber dawttu an ni ta tih sawiin, an beisei angin sorkar-na siam ta rih lo mah se, Pathianin a dah chu a lawm a, an pawm thlap tih a sawi a. ZPM chu mipuiten beiseina sang tak nen an thlir a, hetianga pawl hrang hrang inzawmkhawm ni lo hian pawl pakhat an inchhunfin hun nghakhlel takin an thlir mek tih sawiin, hemi kawngah hian chak zawka hma an lak a \ul tih a sawi bawk.
