Vawiina Press Statement a siamah Pu Lalduhoma hian tunah chuan Mizoramah hri vei pawh an awm tawh lo a, mi dang tibuai tawh rih lovin, sorkar hnathawk te hlawh cut sak tum pawh thulh ni se, harsatna an tawk zui ta zel a nih erawh chuan, a tlachawpa ngaihtuah ni zawk se a duh tih a sawi.
Pu Lalduhoma hian mi dangte chunga phurrit siamsak hmain, sorkar in inrenchemna a kal pui phawt tur a ni a ti a. Mizoram Budget ah zin veivah nan cheng vbc 23 nuai 54 dah a nih thu te, Minister te zingah motor pali lai kawl an la awm thu te, Office Expenditure atana cheng vbc 50 dah a nih thu te sawiin heng atang hian sum tam tak a hum theih dawn a ni a ti a. Capital Expenditure atana sum dah cheng vbc 930 pawh tun dinhmunah Project leh programme kalpui hleih theih a nih dawn loh avangin thahnem tak a hum theih a ni a ti a, SEDP atana Board 14 din pawhin mipui mit a timim tan niin Pu Lalduhoma hian a sawi.
Pu Lalduhoma hian Covid-19 dona atana an thawhlawm chu party induhsak nan te, vote zawn nan leh campaign nana hman an phal lo tih a sawi a. Minister leh MLA te kuta pek chhuah pawh an rem ti lo tih sawiin, pawl leh mimal thawh zat te, a hmanna te, a dawngtu leh an dawn zat te fel taka chhinchhiah in, mipuite hriat theih tura langtlang taka vawn an duh tih a sawi a, fel lo taka hman a nih chuan thuthlukna an lo siam tawh chu ennawn leh an hreh dawn miah lo tih a sawi.
