Vawiina an pawl chhung inkhawmah thu sawiin Pu Lalduhoma hian, India chu Hindu tamna a nih avangin Prime Minister, Narendra Modi leh a kaihhruai BJP Sorkar-in Hindutva tinung thar tura an hmalakna vangin an \hang chak hle a, zuitu pawh an ngah hle a ni, a ti a. Hmarchhak bial, a bikin Mizo mipuiten an duh loh em em Citizenship Amendment Bill chu Afghanistan, Bangladesh leh Pakistan-a Hindu awmte India-a an inbenbel theihna tur a nih avangin BJP ni kher lo tan pawh duh lohna chhan tur a awm lova, hemi avang hian mi tam tak thlawp an hlawh phah a ni a ti. Hetihrual hian eptu pawlte chuan CAB an dodal tur thu an puan avangin an beisei aiin an tet phah niin a lang a, Delhi khawpuia hneh taka sorkar siam mektu AAP pawhin CAB an dodal thu an puan avangin MP-ah chuan seat 1 pawh an la lo niin a sawi. Pu Lalduhoma chuan, Mizoram bika MP tlin \hin dan chu hnam rilru a\anga thlir chuan thinlung a n^ hle a ni, a ti a, Lok Sabha member inthlanna neih zawh takah khan MP Candidate chu Chakma vote vang chauha tling an ni tih an hria a, Tuichawng Bial chu tel ta lo se chu, mipui candidate kha Vote 3,329 a chak tur a ni a ti a. Kum 2014 MP inthlanah pawh khan |angrual Candidate, Pu Robert Romawia kha Chakma vote vang bawkin a lo tla tawh nia sawiin, Mizoram aiawha MP thlan tlin \hin a nih danah Mizote an harh a \ul niin a sawi. Pu Lalduhoma chuan, India khua leh tui dik tak Chakmate chu a pawnga puiin an do lo tih sawiin, hetihrual hian CADC huam chhunga kum khat-a VC thar 14 ngawt a piang thei chu pun dan pangngai a ni lo tih a lang reng a. Heng dan lova Mizorama lo pem lutte hi sorkar hian man chhuakin, an khaw dinte pawh \hiat nghal turin an phut tih a sawi.
MP inthlan dawn khan CAB duh lovin NGO ten Narendra Modi-a lim an hal a, Kohhran hoten thuchhuah an siam bawk a, NDA an sorkar leh ang tih mipuiten an hlau tlang hle niin a lang. Khami avang khan NDA lama tel lo tur MP lo tih tlin ve chu tihmakmawhah ngaiin, \ang ho turin Prism leh Zoram Tharte pawh an sawm a. Party dangte an remchan tak loh avangin, Congress nen chauh an thawk ho ta niin a sawi a, hei hi Mizoram, Hnam leh Sakhaw himna tur nia an ngaih vang nia sawiin, tunah chuan inthlan a zo ta a, ZPM Steering Committee Chairman-in an kal zel dan tur a lo puan tawh angin, an din chhan tihlawhtling turin hma an lak tur thu leh Party pakhat-a inchhunfin pawh an hlawhtlin \ep tawh thu Pu Lalduhoma chuan a sawi.
ZPM chhung inkhawm hi Caucus Member, Pu VL. Remruata’n a kaihruai a, Caucus Member Secretary, Dr. Kenneth Chawngliana leh Steering Committee Sr. Vice Chairman, Pu C. Laltanpuia te pawhin thu an sawi a ni.
