|angrual pawl, Zoram Peoples’ Movement-in vawiin khan Treasury Square-a ZNP Pisa-ah intuai tharna hun an hmang a. He inkhawmah hian ZPM puipate zinga mi Pu PL. Liandinga’n ZPM-in kalphung thar hmanga Zoram siamthat a tumna kawnga an tih tur leh tih loh hrang hranga a sawifiah a. |angrual Pawl-in thuneihna a chang a nih chuan Party mal sorkar ni lovin mipui sorkar a ding dawn a, inthliarna awm lovin ang khat vekin mi tin-in sorkar zar an zo thei dawn niin a sawi. Pu PL. Liandinga chuan, tun hma atanga Mizorama thuneihna chang tawhten ram leh mipui an enkawl dan a fuh tawk loh avangin vawiina Mizoram dinhmun chu India rama State pachhe ber leh hnufual ber a la ni a ti a, hei hi thil lungchhiatthlak tak, hnam ang pawha mualphona niin a sawi a. Hetiang zela ram a kal chuan tun aia chhiatna rapthlak zawkah Mizoram chu a inbarh lut ang tih a hlauhawm hle niin a sawi. Pu PL. Liandinga hian mipui Sorkar siam tura tangrual pawl tih tur leh tih loh tur hrang hrang tarlangin, pawisa an sem ve loh tur thu te, sawhthing lei a nih tur thu te, Mizoram kutchhuak chawisan a nih tur thu te, Sorkar hmasa hmalaknaa mipui tana tha tur chu thawh chhunzawm a nih tur thu te, mipui nen tangruala hmasawnna hna thawh a nih tur thu te, inkalpawhna kawngpui tha a awm theih nan, a tul anga hmalak a nih tur thu te, huapzo sorkar din a nih tur thu te, zirna ti hmasawn tur leh kawng hrang hranga mipui hmathatna ngaihtuah a nih tur thu te a sawi a. Midang sawichhe lo tur te, mi hnial vak vak lo tur te, mahnia thutlukna siam mai lo tur te, zu nam chunga Campaign lo tur te, thil an sawi sual a nih pawhin an tanna ngaiah tang tlat lo tur leh beidawng sa mai lo turte’n ZPM member-te chu a fuih a ni.
He inkhawm hi ZPM Steering Committee Vice Chairman, Pu Lalthansanga’n a kaihruai a. ZNP President, Pu Lalduhoma leh ZPM Treasurer, Pu F. Rodingliana’n thu an sawi bawk.
