Thuchhuah an siamah ZPM chuan, vawiin thlenga Mizoram buaina pakhat “Ramri” chungchangah kum 2017 July ni 27 khan MNF Gen. Hqrs. chuan thuchhuah siamin, an sorkar hmasa kum 2006 khan Ramri chungchang ngaihtuahtu tur, Joint Parliamentary Committee din a nih thu leh kum 2007-ah Prime Minister hnenah Boundary Commission din tura ngenna Memorundum siam a ni a, All Party Delagation in he Memorundum hi thehlut tura tih a nih laiin, rokhawlhna a awm avangin khatih laia Chief Minister Pu Zoramthanga khan a thehluh tih an tarlang a. Kumin June ni 12 a\anga ni 27 chhunga Assembly Budget Session neih zawh takah khan ZPM Leader, Pu Lalduhoma chuan Boundary Commission Memorandum chungchang hi a zawt a, he zawhna Home Minister Pu Lalchamliana chhannaah Boundary Commission dinna tura Memorandum siam kha Prime Minister hnenah thehluh a nih hriat a ni loh thu leh thehluh a nih loh chhan chu File-ah record a awm loh thu Home Minister hian a tarlang a ni, an ti a.
He chhanna a\ang hian MNF sorkar hian mipuite hnenah thudik ziktluak lo a hrilh fo tawh chiang takin a tilang a. Chief Minister-in a hmathlir a sawi \hinte pawh tihhlawhtlin awm lovin tam tak a thamral a. Tuna an sorkar leh hnuah pawh thutiam tam tak neiin bul an \an a, tun hmaa an lo chin \hin thudik ziktluak lo sawi \hin chu bansan a, an tihhlawhtlin ngei tur thudik chauh sawi tawh turin ZPM chuan thurawn an pe tih an sawi.
