ZPM |angrual Pawlin vawiin khan Aizawl leh Lunglei inkarah beihpui an thlak a, naktuka Lunglei District Tangrual Pawl Office hawnna-a tel tura kal, ZPM hruaitute hi an Chairman, Pu Lalliansawtan a ho a, an pal tlang khaw 9-ah lo hmuakin vantlang inkhawm an lo buatsaih a ni.
Khaw hrang hranga thu sawitu, Pu Lalduhoma chuan, “Tangrual Pawlin sorkar a siam hunah chuan sorkar building-ah leh sorkar luah zawng zawngah tualchhung siam furniture leh Zonu tah puan chauh hman a ni ang a, zirlaiten tualchhung siam uniform-ah an ha ang a, ram chhung thar buhte ration-ah sem a ni ang. 2018-a Tangrual Pawl siam tur sorkar chu ‘Made in Mizoram sorkar’ a ni ang,” a ti a, Pu
Vanlalhlana pawhin, “Mizoram mipuite hian sorkar hmel thar, kalphung thar sorkar pian hun an nghakhlel tawh hle a, khaw hrang hrangah ZPM district/block/local committee a ding mawlh mawlh a, mipuite nghahhlelhna leh chona hi a nasa hle a ni,” a ti bawk.
Thu sawitu dang, Pu PL Liandinga chuan, “Kum 30 chhunga thuneihna inchan chhawkten Mizoram hi state hnufual ber, hnam hrisel lo ber, zirna kawnga \huanawp bera an chhuah nia sawiin, hei vang hian politics ngaihtuah ve ngai reng reng lo tan pawh ngawi renga thlirtu nih a, mawhphur ve lova inngaih mai hi thil theih a ni ta lo,” a ti bawk.
Pu K. Sapdanga pawhin thu sawiin, “Tangrual Pawl sorkar hunah chuan hawrawppuia ziah leh pencil-a ziah a awm hrang lo ang a, Mizo tawh phawt chuan inang vekin sorkar zar an zo ang,” a ti a,
ZPM hruaitute hian Zirtawpniah Hnahthial tlang dungah beihpui thlak chhunzawm an tum bawk a ni.
