Vawiina Aizawl Press Club-a thuthar lakhawmtute an kawmnaah Pu Lalduhoma hian, CAB chungchanga Union Home Minister thusawi hi Mizo mipui tan lawmna tur pakhatmah a awm lo tih sawiin, ILP chu India mi, Mizorama lo lut tur danna a ni a, CAB erawh ram dang a\anga India-a lo luh phalna a nih avangin ILP leh CAB hian inkaihhnawihna pakhatmah a nei lova, tuna Mizoten an ngaih theih loh ber chu Bangladesh a\anga dan lova lo lut Chakma-te an ni a, ILP hian Chakma-te a dan theih loh avangin CAB kalpui turah ILP tihchak a nih tur thu Union Home Minister-in a sawi hian awmzia a nei lo tih a sawi.
Pu Lalduhoma chuan, CAB hi India ram ril zawka chengte tan chuan a \ha pawh a ni mai thei a, hmarchhak bial tan erawh a him loh avangin a tirte a\anga an dodal a ni a ti a, tun hnaia amah kawmtu NGO-te hnena Home Minister Amit Shah-a’n CAB kalpui turah ILP tihchak a nih tur thu a sawi chu inhmuhsitna ang hiala a ngaih thu a sawi.
Pu Lalduhoma chuan, Assembly Budget session-a a zawhna chhanna a\angin Mizoramah hnam dang ILP nei mi sing 2 chuang an awm a, ILP nei lo hnam dang engzat nge awm ang tih chu ngaihtuah tham a ni, a ti a. ILP pek chhuahna hi Mizoram hmun hrang hrang bakah State danga Mizoram House-ah a awm hlawm a, hengah te hian dan dik lovin ILP engzat nge pekchhuah a nih ang tih a hriat loh avangin ILP pek chhuah dan hi tun aia fimkhur zawka kalpui a \ul tih a sawi.
ZPM Legislature Party \hiah anih thu Speaker a\anga lehkha and dawn chungchangah Pu Lalduhoma chuan, ZPM lo pian chhuah dan chu Mizoram mai ni lo, India ram puma party hrang hrang te pian dan tho a nih avangin Speaker chu ZPM Legislature Party a \hiahna sut turin an ngen tih a sawi a, he thilah hian Speaker chhanna an nghah mek thu a sawi bawk.
