VC leh LC dinglaite chu ZPM pian hma, kum 2015 April 30-a thlan kha a ni tih Pu Sapa hian a sawi a, kumin April ni 30-ah an term a tawp ang a, chumi hma ngei chuan inthlan a ngai dawn a, chu chu ZPM party chuan nghakhlel takin a thlir mek a ni a ti.
Vawiina Aizawla an party office inkhawmah hian Pu Sapa hian VC leh LC inthlan hnuhnung ber hunlai khan, Congress sorkar chuan MLA 36 lai neiin term hnihna, kum khat leh thla lina a hmang mek a, an ropui vanglai tak a ni a ti a. Chuti chung chuan, Aizawl hming chawi MLA bial 11-a LC 114 a\angin, ruling Congress chuan, a zatve pawh a la pha lo a, LC 50-ah chauh a chak a, LC 64 ngawtah a chak lo a ni a ti a. April thlaa LC leh VC thlan hunah, rorel lai MNF pawhin, MLA 27 neiin, kum khat leh thla lina an hmang ve leh chiah dawn a, an ropui vanglai takin VC thlan a ni ve leh dawn a. Khawpuiah chuan, ruling party hian Local Council inthlanah nghawng a nei ngai lo tih, VC inthlan hmasa result a\angin chiang takin a lang a ni a ti.
ZPM chu kum 2017 August thlaah din a nih thu te, a pian hnua inthlan awm hmasa ber chu kum 2018 November thlaa MLA thlan anih thu te, khatah khan Aizawl khawpui chhung MLA bial 11-ah, ZPM chuan vote 62,603 a hmuh thu leh bial rukah hnehna an chan thu te Pu Sapa hian a sawi a. MNF party chuan vote 64,533 hmuin, bial ngaah hnehna an chang a, Ruling Congress party chuan vote 44,067 hmuin, Aizawl bikah chuan, khawi bialah mah hnehna a chang zo ta lo a ni a ti a. April ni 11-a MP inthlanah pawh MNF chuan Aizawl bikah vote 52,472 a hmu a, thla li chhungin Aizawl huam chhung chauhah vote 12,000 zet a hloh hman a, an rorel dan nen pawh a inmil tawk viau a ni a ti a. An vote bo hi khawiahnge a kal hriat a nih loh laiin ZPM vote erawh chu a pung thung a ni a ti.
February thla chhungin campaign team 14 insiamin ZPM chuan beihpui thlak a tum tih Pu Sapa hian a sawi a, VC leh LC inthlan lo awm turah mipuite beiseina tihlawhtling turin theihtawp chhuah an tum tih a sawi.
Pu Sapa hian Mizoram mipui, Kohhran, sorkar hnathawkte leh Mizo \halaite duhdan ZPM in a hre chiang thawkhat tawh nia sawiin, dai sual nawn a tum tawh lo ang a ti a. Member neih tam te, unit neih tam te, block neih tamte a pawimawh rualin, mipui rilrem zawnga kal ngam a pawimawh zawk tih chu politics kalphung thara ZPM ngaihdan a ni a ti.
