He thu hi vawiina Aizawl West I huam chhung Sairang a ZPM vantlang inkhawm buatsaihah a sawi a. Pu Lalduhoma chuan vote zawn nan Congress in NLUP atan cheng Vbc. 2800 vel a hmang niin a sawi a, hemi avang hian Sorkar Deptt. hrang hrang te chuan hna an thawh theih loh phah niin a sawi a, hetihlai hian MNF in a let thawk cheng nuai 3 sem an tum thu an tlangau pui leh mek tih sawiin, Congress leh MNF ten sem tur ringawta sum an dah theih chuan ZPM in sawhthing lei nan sum a dah thei tih a chiang a ni a ti. Pu Lalduhoma chuan, NGO ten Chakma candidate nei lo tura Political party tinte an ngenna zawm awm chhun chu ZPM a ni a ti a, MNF in Chakma Candidate an dah chu Mizo te do tlat tu nia sawiin NGO te ngenna zawm duh lova pawl hrang hrangte an kal a nih chuan nakin zel atan NGO te hlutna a tlak hniam phah a hlauhthawnawm a ni a ti a, NGO te dinhmun ti hniamtu nih loh a pawimawh a ni a ti.
Pu Lalduhoma chuan, ZPM leh BJP thawkdun anga mithankhetin an sawi chu thudik lo a ni a, engtikawngmahin a thawk dun lo niin a sawi a, MNF ten Pu Lalduhoma leh BJP chinchhiahna dahduna mipui rilru hruaikawi thei zawnga lehkha an thehdarh avanga ZPM in CEO a an lungawiloh thu an thlen hnuah MNF te insawifiahna chu CEO in a pawm lo niin a sawi a, MNF te hian ngaihdam an dil chuan ZPM chuan a ngaihdam theih thu sawiin a nih loh erawhchuan dan hmangin an chungchang chu ngaihtuah zel a ni ang a ti. Pu Lalduhoma chuan ZPM in thuneihna a chan chuan \halai thawhtur nei lo te khaichhuaha an thawhtur ngaihtuah sak an tum niin a sawi a, an dinchhuahna tur an zawnga hmalak pui an tum thu sawiin hemi atan Training neihpui an nih tur thu leh sem policy ni lovin hnathawh hmanga intodelh tir chu an tum a nih thu a sawi bawk. He inkhawmah hian ZPM Star Campaingner Pu Vanneihtluanga leh Sr Vice Chairman Pu F Rodingliana ten thu an sawi bawk.
