|angrual pawl, Zoram Peoples’ Movement inpuan chhuahna leh hruaitu hlanna chu vawiin khan Aizawl Chanmari YMA Hall-ah neih a ni a. Rev. Dr. K. Thanzauva’n ZPM hruaitute chu Mizoram leh hnam himhim tur te, hmasawnna kawnga hruai tur leh dik tak, rinawm tak, taima taka thawk tur leh an pawl din chhan leh thil tum tipuitling tura hrui khat vuana thawk ho zel tura intiamtirin a tir chhuak a ni.
Vawiina ZPM inpuan chhuahna leh hruaitu hlanna inkhawm hi ZPM Steering Committee Chairman, Pu Lalliansawta’n a kaihruai a, Steering Committee General Secretary, Pu K. Sapdanga, |angrual Pawl thupuangtu chuan an pawl thuthlung a sawifiah bakah hma lak dan tur hrang hrang a sawifiah a. Mizoramah kalphung thar hmanga mipui sorkar, hnam damna tling din duhtuten August ni 15 khan he thawhhona thu hi an thlung hi tih sawiin, nakkuma Assembly inthlanpui leh hun lo la awm zel turah \angrual chhunzawm zel turin he thuthglung hi duan a ni tih a sawi a. Pu Vanlalhlana’n ZPM \halaite chu rinawm taka Mizoram tana thawk turin thu a tiamtir bawk.
He inkhawmah hian |angrual Pawl Val Upa Council Chairman, Pu Lalfakzuala chuan, Mizoramin a mamawh ber chu tun hma a\anga vawiin thlenga sorkar awm tawhte ang ni lo, sorkar kalphung thar a ni tih a sawi a. State puitlinga Mizoram hlan kai a nih hnu kum 30 chhungin Party 2-in ro an inrel chhawk a, hei hi mipuiten an duh khawp loh avangin he thawhhona hi lo piang ta nia sawiin, he pawlin a tum ber chu mipui sorkar din a, ram leh hnam himna tur leh mipui mamawh sorkar din a nih thu leh duhsak bik awm lova, mi zawng zawng ang khata ena a, dan lalna ram din chu an thil tum ber a nih thu a sawi. Pu Vanneihtluanga pawhin, khawvelah mi chi hnih – ram leh hnam damna hria, ram hruaitu ni tura tlin dan thiam leh chutiang hre ve tho, ram hruaitu ni tura tlin dan thiam lo an awm niin a sawi a, ZPM hian hruaitu \ha a nei dawn tih sawiin, heng mite hi mipuiin an rin loh chuan tunge rintlak chuang ang tih chu ngaihtuah tur nia a ngaih thu a sawi.
Val Upa Council Vice Chairman, Pu F. Lalremsiama pawhin, heti taka boruak an siam chhan chu Mizoram humhalh an duh vang niin a sawi a. Pawl \henkhat chu an sorkar apianga Chakma Minister awm ngei ngei ngai an awm nia sawiin, tuna Mizoram pawl lian pahnihte pawh hi an sorkar chuan Chakma Minister neih ngei ngei a ngai dawn em tih ngaihtuah a ngai niin a sawi. Pu Lalthanliana, MLA pawhin Social media leh Platform hrang hranga Party insawichhiatna tam lutuk chu \ha lo a tih thu leh engtin nge ramin hma a sawn theih ang tih lamah ngaihtuahna sen thar \ul a tih thu a sawi a. Ram hruaitute chu belh ngam leh rintlaka an awm a \ul avangin, chutiang duh lote chu paih ngam a hun tawh tih a sawi.
Val Upa Council member, Pu Bualhranga chuan, mihring reng reng fel lohna lai nei vek an ni avangin ram changkang zawkah chuan an hruaitute kal sual tur venna dan \ha tak an nei \hin a. Mizoramah erawh chuan Party President chu CM an nih nghal deuh zel avangin mipuiin an intlawn siak lo thei lova, firfiak takin ro an rel phah ta \hin nia sawiin, Val Upa Council hi ram kaihhruaina kawngah a \angkai hle a beisei thu a sawi. Pu PL Liandinga pawhin tuna Mizoram hruaitute chu mi fel tak tak ni mah se, ram an kaihhruai dan chu lungawithlak loh hlea a hriat thu a sawi a. Inthlan dawna sum sem te, vote lei te, kawngpui chhia te, zirna chhe lutuk te, sem Policy-te chu a pawm theih loh avangin he hma laknaah hian a tel ve niin a sawi.
MPC President, Pu Lalhmangaiha pawhin ZPM thawhhona chuan, kum 30 chuang rorelna \ha lo hnuaia awm chu mipuiin an nin tawhzia a tilang chiang hle niin a sawi a. Tunah hian Mizoram chu Pathianin ram min pek ven him kawngah ke a pen tawk lova, intodelhna tura ram min pek pawh hman \angkai theih a ni lova, sakhaw dangin a chim ral mek avangin kalphung thar a mamawh tawh hle niin a sawi. ZNP President, Pu Lalduhoma chuan, sorkar \ha siam turin hruaitu \ha an tawk mai lova, sorkar kalphung \ha neih a pawimawh tih a sawi a. Sem Policy hmanga Party pahnihin kum 30 chhung Mizoram an kaihhruai chhungin mipuiten hma an sawn phah lo mai ni lovin, ramin a tuar hle tih a lang chho mek zel nia sawiin, hruaitu \ha tehna tur chu ram an kaihhruai rei zawng ni lovin hruaitu an nih chhungin an thlazar hnuaiah mipuite an him em tih leh ramin hma a sawn em tih a ni a, chuating a nih loh chuan an sorkar rei poh leh \hangtharten an dem lutuk ang tih a hlauhawm zawk niin a sawi a ni.
