Kum 53 mi nia thi, Pu RK Lianzuala hian a nupui T. Laltlanchhungi leh a fate pahnih, Lalhruaitluanga leh Hmangaihzuali te a kalsan a ni. Pu RK Lianzuala hi Pu Sawichhunga (L) leh Pi Lianmawii te fa pasarih zinga a naupang ber niin kum 1966, May ni 29 khan Champhaiah a piang a, lehkhathiam thei tak niin, BA (Sociology Honours) kum 1987 khan a pass a, Gold Medilist a ni a, kum 1989 khan MA (Public Administration) pass lehin hetah pawh hian Gold Medalist leh bawk a ni. MA a zawh hnu hian St Pauls High School-ah a thawk a, he hna a thawh lai hian kum 1991 a\ang khan All India Radio Aizawlah chanchinthar chhiartu leh English news lettu, News Reader cum Translator hna contract-in a thawk tel bawk a, kum 1992, April thla a\ang khan Mizoram sorkar hnuaia Printing & Stationary Deptt.-ah Editor hna a thawk a, hetihlai hian All India Radio-ah Assistant News Editor hna thawkin kum 1996, November thla a\ang khan Deputation-in a kal a, he hna hi engemawchen a thawk a, hemi chhung hian Thomson Foundation UK-ah training-in Diploma in Broadcast Journalism a zo a ni. Kum 2004, November thlaa Zonet Cable TV Pvt. Ltd. a din \an khan sorkar hna a thawh chu bansanin hun puma thawkin, a khaipa ber a ni a, a thih ni thlengin he hna hi a thawk a ni. Amah hi thuziak thiam leh sawi thiam a nih bakah TV leh All India Radio-a chanchinthar leh thildang puan thiam a ni a, Journalist \ha quality zawng zawng a nei kim a, Mizote zingah chuan hemi kawnga mithiam awm chhun te zing a mi a ni a, Mizote leh hnamdangte pawhin an hriatreng tur sulhnu tam tak a hnutchhiah a ni. Kohhran leh khawtlang tana nasa taka inhmang mi a ni bawk. Pu RK Lianzuala hian thil lem lamah harsatna a neih avangin nikum February thla khan Aizawlah Doctor thiamte a berawna, February ni 6 khan chaw kawng Cancer a ni tih hmuh chhuah a ni a, hemi hnu hian Vellore panin enkawl nghal a ni a, chau thla zelin vawiin chhun dar 11:15 khan chatuan ram a pan ta a ni.
Pu RK Lianzuala hi zanina lumen a nih hnuah naktuk chawhnu dar 1-ah vui a ni ang a, bialtu Pastor Lalzawmliana’n thlamuanna thuchah sawiin a vui dawn a ni.
