Zomi Nam Ni vawi 70-na nimin khan Champhai vengthar Community Hall-ah hman a ni. He ni hmanpuitu, School Education Minister, Pu H. Rohluna chuan Zohnahthlakte inpumkhatna atana tan lak zel a pawimawh thu sawiin Zohnahthlakte hi hmun hrang hrangah thendarhin awm rih mahsela engtik niah emaw chuan rorel khawl khat hnuaiah an awm a besei thute, Mizo hnam nun dan vawn nun zel a tul thute leh hmasawnna atana a huhova tan lak a tul thute a sawi a ni. Hemi hmalam, nimin zing khan Minister hian Champhai khawpui chhunga zirna in hrang hrangte a tlawh bawk a, hemi hnu hian Lengteng biala khaw hrang hrang fang turin a chhuak zui a ni. ————-
Nizan dar 7 vel khan Aizawla Muanna Vengah Vanpuilala Thingzaina Workshop leh hnathawktute chenna in bungraw engmah chuh hman lohin a kang ral vek. Muanna Veng Branch YMA hruaitute hnen atanga thudawn danin he Workshop building, Assam Type Sethlam leh a bula hnathawktute chenna in te hi Zarkawt veng mi Pu Sangsiama ram an luah hawha sak a ni a, an workshop-ah hian Teak leh thing dangte zaiin thil chi hrang hranga hman turin design sain an thawn chhuak thin a, kangmei chhuak hian design khawl 9 leh thingzaina band-saw bakah thing tam tak leh an buangruate a kang chhe vek a, a hlut zawng hi nuai engemawzat a tling a ni. Kangmei chhuak hi hriat a nih chuan a lo nasa hman tawh a, Police kangthelh pawl tirhte chuan kangthelh motor 6 hmangin an thelh mit thei a ni.
