He Handloom Fair hi Khatla-a Aizawl Convention Centre sakna tura ruahman, lei tlakhniam vanga sak tak lohna hmunah neih a ni a, a hawngtu Pu Zonunsanga Khiangte chuan, puanthah chu Mizo kutchhuak ram danga thawnchhuah awmchhun a ni chu chhuanawm a tih thu sawiin, ram pawna thawn chhuah Mizo tual tah puan chu Mizo nihphung tarlangtu a nih avangin a tahtute pawhin tun aia \ha zawka tah tum tur leh puan tam zawk tah zel tum turin a chah a ni. MJA President chuan, hmarchhak bial State dangten Handloom and Handicraft lam buaipuitu tur Directorate hran an neih vek tawh laia Mizorama puantah lam buaipuitute Commerce and Industry Department hnuaia Cell pakhat ang leka dah a la ni chu \ha lo a tih thu sawiin, Handloom chauh ni lo pawl hrang hrang thil siam leh thar hralhna tur Exhibition Hall mumal a la awm chu ngaihtuah ran ni se a duh thu a sawi a. Mizo kutchhuak humhalh tura a neitu nihna nghet nei tura hmalak \ul a tih thu a sawi bawk.
A hawnna inkhawm kaihruaitu Zohanfed President, Pu Kapthangvunga chuan, Mizorama Handloom lam buaipuitute chuan \anpui an ngai hle tih a sawi a. Kawng hrang hranga hmasawn tura \an an laknaah a sawi laia phur viau a, a taka tihhlawhtlin harsa leh si hruaitu an neih \hin avangin tun dinhmunah hian an la \ang nia sawiin, vawiin thlenga an thil siamchhuah zawrhna hmun mumal pawh an la nei lo chu a zahthlak a, a mawhohurtu Sorkar chu zak tur nia a hriat thu a sawi. He Fair-ah hian puan tah leh a kaihhnawih lam chi hrang hrang an zawrhte chu a man pangngaia aia zaa 10-a tlawmin an hralh a ni.
