Zodin Multi Level Car Parking cum Utility Centre sak nan hian NEDP hnuaiah cheng nuai 2500 dah a ni a, JMT Architect leh Precision Automation & Robotic India Ltd. (PARI) ten a sak dan tur hi an duang a, hmanraw changkang ber chia thuam tur a ni. Chhawng 9-a sanga sak a ni ang a, Car khalhtu in a chhunga tlankuala park na zawn chawp ngai lovin parking bay-ah a khalhtu in motor a hnutchhiah anga, a dahna tur awl remchangah khawlin a dahlut dawn a, hei hi Robotic lift system tia sawi a ni a, heng bakah hian kangmei chhuah thulha himna turin firefighting system leh automated fire alarm te dah a ni ang a, mi 13 chuan theihna lift pawh dah a ni ang. Lirtheih dahna bakah he centre ah hian food court, exhibition neih theihna tur hmun, mi 200 thut theihna tur multipurpose hall leh office te a keng tel dawn a ni.
Centre sak \anna tur lung phumtu Pu Zodintluanga chuan Lirthei nasa taka a pun avangin Aizawl khawpuiin harsatna a tawk mek a, harsatna ti nep turin lirthei dahna tur hmun sak chhoh zel tum a ni a ti a, UD&PA Dept chuan kawng pengthuam hmun engemawzat a zauh tawh tih a sawi, Pu Zodintluanga chuan Zodin Multi Level Car Parking cum Utility Centre sak dan tur ruangam duang turin Mizorama architect rual zingah inelna buatsaih a ni a, chuta ti \ha ber chu thlang chhuakin, a thawktu tur pawh open tender hmanga thlan a ni a ti.
UD&PA Secretary Dr.C.Vanlalramsanga kaihhruai lungphum puala inkhawmah hian Pu T.Sangkunga MLA pawhin thu a sawi.
