ZMC Covid 19 Laboratory-ah hian nimin khan sample 256 endik niin, an zinga 254 chu hri lakah an fihlim tih finfiah a ni a. Hri kai hmuh tharte hi Aizawl District mi mipa ve ve an ni a, pakhat zawk chu kum 29 a upa, Assam Rifles sipai, June ni 28-a Maharashtra atanga Mizorama lo thleng, Zokhawsanga khung hran mek a ni. Midang pakhat chu kum 12 mi, Chandigarh atanga tun thla ni 6-a Mizorama lo haw, inkhunghranna hmuna awm lai a ni. Nimin khan Lunglei Civil Hospital-a TrueNAT Laboratory-ah samle 31 endik a ni bawk a, heng mite hi hri kai nena inhnimhnaihna nei vek an ni chungin, vanneithlak takin Lungleia sample endik zingah hri kai an awm lo a ni. Hetihlai hian, Siaha Dedicated Covid Health Centre-a hri kai enkawl dam mi 8 chu vawiin khan chhuah tir an ni a, Siaha-ah hian hri kai hmuh tawh 23 zinga 17 an dam ta a ni.
Nimin thlenga Mizorama sample endik tawh 16,983 atangin Covid 19 hri kai hmuh chhuah chu mi 233 an tling ta a. Mizorama Sample endik zinga 16,343 chu ZMC Covid 19 Laboratory-a endik a ni a. Lunglei Civil Hospital-a TrueNAT Laboratory-ah samle 582 endik tawh a ni bawk. Mizorama Covid 19 Laborator awm hma khan Kolkata-ah sample 5, Guwahati-ah 12 leh Silchar-ah sample 41 endik tura thawn a lo ni tawh a ni. Hetihlai hian vawiin khan Siaha-a hri kai enkawl dam mi 8 chu damdawi in atanga chhuah tir an nih avangin Mizorama hri kai zinga 159 chu enkawl dam an ni tawh a. Hri kai zawng zawng atanga enkawl dam hi zaa 68.24 a tling tawh a, tunah hian hri kai enkawl lai 74 an awm mek a. Mizorama hri kai hmuh tawh zingah thi an la awm lo a ni.
