Nizan khan Mizoram pumah YMA leh Police-ten state pawn lam mi, Inner Line Permit nei lo leh fel lo dap beihpui an thlak a, dan lova lo lut, hnam dang mi 550 an man. YMA Kumpuan, Ram leh Hnam Humhalh bawhzuina atan Central YMA chuan nizan khan a rualin Mizoram puma YMA branch-te chu, an branch huam chhunga ILP nei lo leh fel lo dap beihpui thlak turin a hriattir a. Hei hi bawhzuiin YMA branch tinin police-te nena thawk hovin hnam dang mi, ILP nei lo leh fel lo dap beihpui hi an thlak a ni. He thu buatsaih thlenga Central YMA-in a hriat theih chinah ILP nei lo leh fel lo, mi 550 an khawm tawh a. Aizawl khawpui chhungah chuan mi 327 man an ni a, Aizawl Police Station-ah mi 175 dahin, Bawngkawn Police Station-ah mi 152 dah an ni a. District khawpui dang leh Aizawl khawpui pawna YMA Branch leh police-ten mi 223 an khawm bawk a ni. Heng ILP nei lo leh fel lo man khawmte hi Aizawl Police Station leh Bawngkawn Police Station-ah Magistrate ten kal chilhin Camp Court an nei a, Mizoram hmun danga mante pawh vawiin khan Court-ah hruai an ni bawk a. Thuneitute hian an thawn haw dawn nia hriat a ni. YMA Kumpuan Chairman leh Central YMA Vice President, Pu Vanlalruata chuan Zonet zawhna chhangin, YMA kum puan bawhzuia hetianga beihpui thlak a nih apianga dan lova lo lut thahnem tak man tur an aw thin chu thil chinfel ngai tak nia a hriat thu a sawi a. Hetianga dan lova hnam dang mi thahnem tak an lo luh theihna chhan hi ramri-a duty-te vang nge, office lama lo buaipuitute vang tih pawh chhui chian a ngai tak nia a hriat thu a sawi a ni.
