Tun thla ni 17 a\anga ni 19 thlenga Champhai Zotlanga YMA General Conference pandal tur chu sak mek a ni a, Zotlang Field thara pandal sak mek hi mi singkhat vel len theihna tur, a dung feet 190, a vang feet 160-a lian a ni a, Silchar-a pawl pakhat, Chake Swari-in cheng nuai 16-in contract-in an sa a, tunah hian a chung a chanve vel chih zawh tawh a ni a, pandal sak nan hian Central YMA thir structure hmang lovin mau an hmang a ni. A bang pawh a hma lam pin zawh tawh a ni a, kar lehah chuan a vaia peih fel tum a ni. Pandal Committee ruahman angin Pandal sakah hian Zotlang VC leh YMA ten hnatlang an ko \hin a, tha tam tak an seng tawh a ni. Champhai leh Seling inkar kawng chhe lutuk pawh PWD Highway Division-in an siam zel a, ruah la sur zeuh zeuh mah se, a tlem deuh tawh avangin an dinhmun a ziaawm hret tawh a, kawng khuar leh chhe zual lai an hnawh mek a ni. Keifanga BRTF Quarry hlui a\anga lung tam zawk lak a nih theih nan PWD chuan khawl a bun belh mek a ni. Champhai leh Tuipui inkar kawng chhe lai pawh hnawh leh siam mam zel a ni a, a vai hian YMA General Conference neih hmaa siam \hat hman an tum a ni.
