Dr. Li Wenliang hian coronavirus natna leng hi a thawhpuite nen a inbiaktawnna WeChat group-ah a sawi chhuak a, he natna hi an kai loh nan a veng theitu tur thawmhnaw inbel turin a hrilh a, he thu a sawi hnu a ni 4-naah Public Security Bureau chuan lehkhaa a hming ziak turin an ko a, lehkhaah chuan dawt thu thehdarha puhna a chuang a, Wuhan police chuan an man zui a ni. January ni 10 khan Weibo-a a account-ah a khuh \an dan te, a tuka khawsik a neih thu te, a hnu lawka damdawi ina a luh thu te a post a, January ni 30 khan coronavirus a kai tih hriat a ni.
China-a inbiakna atan hman lar tak Weibo-ah a thawhpuiten Dr. Li-a account a\angin ICU-a dahluh a nih hnuah a thi tih an post a, Dr. Li a thi tih mipuiten an hriat veleh an thinrim hle a, sorkar chu na takin an dem a ni.
Dr. Li-a thih chungchangah hian China anti-corruption agency-a national supervisory commission chuan Hubei-ah mithiamte tirin finfiahna neih a ni dawn tih a puang a ni.
China-a social media hman lar tak pahnih, WeChat leh Weibo-ah chuan Dr. Li thih thu hian sawi a hlawh hle a, coronavirus a leng tih hre hmasaa, mipuite inralring tura hrilhhretu man a ni chu pawi an tih thu leh chumi vanga Dr. Li-a ngaihdam dil tura sorkar an phutna te an sawi uar hle a, ‘dawt thu thang thehdarhtu a thi lo va, pasal\ha zawk a ni thi chu’ tih te an post a, China-ah chuan zalen taka thusawi theihna a tlem tih te an post a, sorkar sawiselna post zawng zawng chu kar lovah a bo nghal vek a ni.
Tun dinhmunah China-a coronavirus thihpui chu mi 636 an tling tawh a, mi 31,161-in an kai tawh bawk.
