Film siamtu lar, Winstein Company chu a hnuaia hnathawkte venghim zo lova puhin New York Prosecutor pakhatin a khing.
Film siamtu company hi mipat hmeichhiat kawnga a hnuaia thawkte tih bawrhbanna thleng fo leh pawngsual hial an tawh avangtea khin a ni a, Company dintu Weinstein-a chu a hnuaia hnathawk hmeichhiate nawmnah taka chhaih thinah leh thah hiala vau thina puh a ni. New York Attorney General Eric Schneiderman hian Winstein Company laka thubuai a thehluhah hian Winstein-a bakah a unaupa Robert-a te pawh a khing tel tih a sawi a, kum 6 chhungin Weinstein-a hian a hnuaia thawk hmeichhe tam tak a ti bawrhbang a ni a ti. Nikum October thla khan The New York Times chanchinbu chuan Weinsteina’n a hnuaia hnathawkte a tih nawmnah thin dan hi a ziak a, hemi hnu hian hmeichhe 50 zet chuan mipat hmeichhiatna lam hawia a tih bawrhban ngei thu an puang zui a, an zinga thenkhat chu Hollywood-a film chang thiam mi lar tak takte pawh an tel a ni. Hetiang boruak karah hian Weinstein-a hi Company Board of Director chuan a hna atangin a bantir a, a chet dan hi UK leh US Police ten an la chhui zui mek a, thubuai siamsak erawh an la nei lo thung.
