Assembly session ah ZPM member, Pu Lalduhoma zawhna chhangin, Pu Zoramthanga chuan, Lok Ayukta-in thubuai a dawn 8 zinga 2 chu chhui zui tlak loh nia ngaih avangin tihtawp a nih thu leh a dang pakhat chu a kaihhnawih Department, Environment Forest and Climate Change-ah an lo zirchian turin thawn a ni a. A bak 5-te chu ACB chhui tir an ni tih a sawi. Pu Zoramthanga chuan, Lok Ayukta-in thubuai a chhuina kawngah Investigating Staff an la neih loh avangin tun dinhmunah chuan thubuai an dawnte chu ABC chhui tir mai hin a ni, a ti a. Staff la dah kim loh leh an mamawte chu a theih ang anga ngaihtuah chhoh zel tum a ni tih sawiin, chak taka hna an thawh theih nan bawhzui zel tum a ni tih a sawi.
Mizorama Lok Ayukta din a nih chungchangah hian Speaker, Pu Lalrinliana Sailo chuan, Central lama hotuten Chairperon-ah hnamdang dah an duh a. Chief Minister-in Mizo ngei dah a duh avangin Video Conference hmanga \um 2 an sawi ho hnuah IAS Officer chawl tawh, Pu C. Lalsawta chu Lok Ayukta Chairperson atan ruat a ni ta tih a sawi a. Lok Ayukta Chairperson atan Mizo ngei ruat a nih theihna kawngah hian Chief Minister hmalakna chu fak tlak a nih thu a sawi.
