Vietnam ramah tui lian vangin mi 54 thi tawh

Vietnam ram hmar lam leh ram laili-a tui a len avanga thi chu mi 54 an tling tawh niin sorkar hotuten an sawi a, mi 39 an la bo bawk a, hengte hi ngawrh taka zawn mek an ni. Tun \uma Vietnam rama tuilian hi kum tam tak chhunga he rama tuilian rapthlak ber nia sawi a ni a, tunah pawh hian ruah a la sur zel dawn niin mi thiamte chuan an sawi. Agriculture Minister, Nguyen Xuan Cuong-a sawi danin, chenna in leh lamlian te, thingtlang khaw engemawzat chu nimin khan tuiin a chim a, sorkar hotute chuan, tlangramah lei a min nasat avangin, heng hmunte hi tlawh pawh mai theih a ni lo tih sawiin, thil awm dan dik tak pawh a hriat theih rih loh niin an sawi a ni. Hmun \henkhatah chuan chhungkaw pumpui an mang vekna te pawh a awm a, Ningani pawh khan chhungkaw pali-a mi 19 chu lei minin an in a hnawl avangin an thi vek nia hriat a ni. Hriat theih chinah in 317, tuilian leh leimin avangin a chim a, in 34,000 vel chu tuiin a chim bawk a, ram hectare 22,000-a buh chin a chhe vek a, ran vulh 1,80,000 pawh tui lianin a la tawh a ni.