Vellore CMC-a MBBS zir theihna 100 awmah mi 1 chauh la la

Ram chhunga damdawi lam zirna leh damlo enkawlna tha ber pawl, Vellore-a Christian Medical College chuan kuminah hian MBBS zirna a neih, mi 100 awm theihna-ah mi 1 chauh a la la a, a dang 99 chu a la dah ruak a, hei hi NEET-a tling tawhte, an College-a MBBS zir tura anmahni’n counselling pek an phut vang a ni. Tunah hian sorkar laipui leh state sorkar-in Committee a dinten damdawi lam zir turte hi counselling an buatsaihsak vek a, CMC, Vellore hi chuan anmahni puala buatsaih an duh a ni. Tuna mi pakhat an lak tawh hi sipai fapa, sorkar laipuiin MBBS zir tura a thlan a ni a, seat 62 awmna super specialty programme-ah mi pakhat lak a ni tawh bawk. CMC, Vellore hian ram chhung hmun hrang hrang, thingtlang hmun kilkhawr tak taka mite, damdawi in 180 enkawlin, an hnuai atanga MBBS zir chhuakte chu kum hnih chhung, hlawh tlem zawk la-a an thawh ngei ngei a ngai a, hei vang hian an College-a zir turte chu mi dangte tana tangkai tura inpe, rawngbawlna rilru pu leh sum leh thiamna ringawt um lo an nih a ngai tih an sawi. CMC Principal, Dr Anna Pulimood chuan, NEET chu an pawm thu leh, mark hmu sang ringawt erawh chu an ngaihsan loh thu a sawi a, mi dangte tanpui leh rawngbawlsak duh mi chu an duh ber niin a sawi. Nikumah pawh khan Supreme Court chuan CMC, Vellore hi anmahni-a counselling buatsaih a lo phalsak tawh a, kuminah hian October thla khian a thuchhuak a puan beisei a ni. CMC Vellore-ah hian MBBS zir man a tlawm bik hle a, kum khatah Rs. 3,000 chauh an la a ni.