Horticulture Deptt. enkawltu Chief Minister Pu Zoramthanga hovin Vegetables and Fruits Supply Chain hmalak dan hi vawiin khan thlirho a ni a, Chief Minister chuan hri leng kara mipuiten ei turah harsatna an tawh lohna tura hmalakna chu tha a tih thu a sawi a, hrileng vanga khawvelin harsatna a tawh mekah Mizoram chuan lo neih leh a kaihhnawih hmangin bul tan that theihna hun remchang a nei a ni a ti.
Sorkar thuchhuah tarlan danin March ni 28 atanga Vegetables and Fruits Supply Chain kalpui a nih atanga nimin thleng khan thlai, lirthei chi hrang hrang trip 164 Aizawlah phurh luh a ni tawh a, veng 78 ah sem chhuah a ni a, Home leh Rehabilitation Center leh veng pathumah trip 12 a thlawna sem a ni tawh a, thlai leh thei lei nan cheng nuai 103 sing 2 sang 2,161 sen a ni tawh a, a hralhchhuahna sum tlingkhawm chu cheng nuai 97 leh sang 4,437 a ni.
