Vawiina Mizoram Assembly Session chu tun Mizoram Assembly dinglai Session hnuhnung ber tur a ni tawh dawna rin a nih avangin Speaker, Pu Hiphei chuan House Leader, Pu Lal Thanhawla leh Opposition Group Leader, Pu Vanlalzawma te chu House-a an thil sawi chhuah duh sawina hun a pe a, Pu Lal Thanhawla chuan tun Assembly dinglaiah Pathian kaihhruaina avangin member thi an awm loh thu te, damlote pawh an inenkawl hnuah an \hat chhuah leh avang te-in Pathian hnenah lawmthu sawi a ngai tih a tarlang a, Speaker, Pu Hipheia rorelna kaihhruai kawnga dai hriat tam tak lo nei tawh kaihhruaina hnuaiah buaina awm lova rorelna tluang tak leh mawi taka kalpui theih a ni chu lawmawm a tih thu sawiin, opposition member te pawh thil \ha duhtu opposition member an ni tih sawiin lawmthu a hrilh a, hetiang rorelna kalphung mawi hi chhunzawm zel a nih theih nan \an la zui zel turin member te a fuih a ni. Pu Lal Thanhawla chuan Champhai leh Serchhip bial mipuite zarah Mizoram Assembly-ah member atan \um 9 thlantlin a nih tawh thu te, opposition \hutnaah \um li \hu tawhin, roreltu lamah \um 5 a \hut tawh thu te, amah thlangtlingtu mipuite hnenah lawmthu a sawi bawk a, House Leader nia a kaihruaina hnuaia rorelnaah thil tih dik loh leh midangte rilru ti na thei thil tih leh sawi a awm chuan ngaihdam a dil thu a sawi bawk. Opposition Group Leader, Pu Vanlalzawma pawhin Speaker dai hriat ngah tak Pu Hipheia kaihhruainaa boruak \ha tak hnuaiah tluang taka ro an rel thei chu lawmawm a tih thu a sawi a, rorelnaah House Leader, Pu Lal Thanhawla taima taka a tel \hin te, tun Assembly-ah rorel lai pawl member 34 leh opposition member 6 ten rorel \hin mah se, innekchepna leh innawrbehna awm lova ro an rel thei chu lawmawm a tih thu te, Aizawl West III bial mipuiten an aiawha House-a \hu tura amah an thlan vang te-in lawmthu a sawi a ni.
