An mahni sunna thu sawitu House Leader, Pu Zoramthanga chuan, Pu Lalrinchhana chu ram leh hnam vei mi a ni tih sawiin, Khawruhlian Middle School Headmaster a nihna kalsanin kum 1966-ah MNF Underground a zawm tih a sawi a, ramhnuaia an awm chhungin nihna pawimawh tak tak Dy. Commission, Defence Minister, Supply Minister leh nihna hrang hrang a lo chelh tawh a, kum 1986-a inremna a awm thlengin Councils of Minister a ni, a ti a. Inrem hnua Mizoram sorkar-a Minister a nih hnuah pawh mahni hna \ha taka thawk \hin a ni tih sawiin, a thihna chu Mizoram tan channa nasa tak a ni, a ti. Hetiang bawk hian Pu PB Rosanga chu ram tana mi uihawm tak a ni tih a sawi a, heng mi hmasa pahnihte tunhnaiah inhnaih chilh taka an thi chu an sun hle tih sawiin, an rilru a hrehawm hle a ni, a ti.
Congress member, Pu C. Ngunlianchunga pawhin, tun hmaa Assembly House lo timawi \hintu leh dinhmun pawimawh tak tak lo chelh tawh \hin mi pahnih sun an ngai ta chu pawi a tih thu a sawi a. Mi tam takin Politician-te chu a dah hlat \hin deuh laia an lawina kohhrana Upa an ni theite chu chhuanawm a tih thu sawiin, an kalsan an chhungte Pathianin a awmpui a duhsak tih a sawi.
ZPM member, Pu Vanlalhlana pawhin, an sun tak Minister hlui pahnihte chu kum lamah rual pha lo hle mah se, Assembly 4-naa member a lo nihpui tawhte an ni tih sawiin, an mahni thlahna thu sawi a ngai ta chu a pawi hle a ni, a ti a. An nupui fanaute Pathianin awmpui se tih chu an duh dan a nih thu a sawi.
Pu Lalrinchhana leh Pu P.B. Rosanga sunnah hian MNF member, Pu Lalruatkima, Pu Lalrintluanga Sailo, Pu L. Thangmawia leh Dr. ZR. Thiamsanga pawhin an ui thu an sawi hlawm a. Hemi hnu hian an mahni sun nan ngawi rengin Minute 1 chhung an ding a ni.
Vawiina sun tak Minister hlui, Pu Lalrinchhana hi tun thla ni 18 zan dar 6:15 khan Cancer natna vangin Shillong-a NEIGRIHMS damdawi inah a thi a. Pu P.B. Rosanga hi tun thla ni 19 zan dar 8 khan Aizawl Hospital-ah a thi a ni. An mahni sunna inkhawmah hian Speaker, Pu Lalrinliana Sailo chuan, heng Minister hlui pahnihte hi Session laia boral an nih avangin an ngaihpawimawhna leh an sun zia lantir nan Chief Minister an rawn hnuah sun nghal an rel anga he sunna hun hi buatsaih a nih thu a sawi.
