Tun thla ni 22 thlenga mipui kharkhipna thupek khauh zawk kenkawh dan tur thupekah Lengpui Airport hi khar tura tih a ni a, thupek siamthatna nizana sorkarin a tih chhuahah Lengpui Airport chu thu leh awm hma chuan hawn chhunzawm tur a ni tih tarlan a ni.
Hei bakah hian Khawpui chhunga mimal eizawnna, phalna hranpa lak ngai lova kalpui theih tura tarlan, puan thui, puan tah, thing mistiri hna leh chhang siamna ang chi-ah te hnawthawktute veivahna thilah LLTF/VLTF te hriatpuina lak tur a ni ang tih belh a ni a.
Zin veivah leh mipui chetvelna chungchangah Aizawl Municipal Area leh District Headquarters atanga feh turte chuan zing dar 4:30 atanga zing dar 7:00 inkarah khawpui an chhuahsan fel hman tur a ni tih leh, tlai dar 5:00 atanga dar 7:30 inkarah an in an haw thleng fel leh hman tur a ni tih belh a ni a, hetianga feh chhuak turte hian ziakin an chenna veng LLTF/VLTF te hriatpuina an la hmasa tur a ni a. Hunbi tarlan vawng thei lo te chu feh chhuah phal a ni lo a. Khaw dang zawngah erawh chuan huan lo ram hnathawh chungchangah khuahkhirhna a awm lovang.
Hmasawnna hna leh mimal hna kal laklawh, chhunzawm theih dan dan tur pawh tih danglam hret a ni a, LLTF/VLTF te hriatpuina a tul dawn a, hnathawktute veivah chungchang pawh an remtihna anga kalpui tur a ni ang.
