Hri kai enkawl mekte hi Mipa 28 leh Hmeichhia 2, kum 12 atanga 56 inkar an ni a. An zinga mi 3 chu ICU-a dah niin, ICU-a awm damlo zingah khawsik leh thawhah nasa lutuk lo nei mi 1 a awm a, midang pahnihte erawh chuan harsatna em em an nei lova, Isolation Ward-a awmte zingah pawh ngaihtuahawm an awm lo a ni. Vawiin khan ZMC Covid-19 laboratory-ah ZMC, Aizawl, Lawngtlai, Serchhip leh Mamit District atanga sample dawn 295 endik chhunzawm a ni a, zaninah result hriat theih beisei a ni.
Mizorama Covid 19 hri kai hmuh chhuah tamna ber Aizawl District-ah chuan hri kai 92 an awm tawh a, an zinga 38 enkawl dam tawh niin, enkawl mek 54 an awm a. Lunglei District-a hri kai hmuh tawh 58 zinga 47 dam tawhin, enkawl mek mi 12 an awm a. Lawngtlai-a hri kai 12 hmuh tawh zinga 8 dam tawhin, mi 4 enkawl mek an ni bawk.
Hnahthial District chu hri kai awm lohna District a ni chhunzawm zel a. Saitual leh Khawzawl District-a hri kai 3 hmuh tawh leh Mamit District-a hri kai 20 hmuh tawhte chu enkawl dam vek an ni tawh avangin damdawi in atanga chhuah tir an ni tawh a. Siaha-a hri kai enkawl lai 8 chu an dam tawh avangin nimin khan damdawi in atanga chhuah tir an ni a, Siaha-ah hian enkawl lai mi 6 an la awm a. Siaha-ah hian hri kai hmuh tawh 23 zinga 17 an dam tawh a ni. Champhai-a hri kai 10 zinga 9 enkawl dam an ni tawh a, mi pakhat enkawl mek a ni a. Serchhip-a hri kai 5 hmuh tawh zinga 3 dam tawhin, enkawl lai 2 an awm a. Kolasib District-a hri kai 12 zinga 11 enkawl dam tawh niin, enkawl lai 1 a awm a ni.
