Mattis chuan Arab ram hruaitute hnenah hian US-in Khashoggi thah a nih dan rawng tak chu a en liam loh tur thu leh a ti \huanawp zawnga khawsa ram chu khawvel huapa remna leh muanna ti derthawngtu an nih thu a sawi bawk a ni. Puan tawh angin Khashoggi hi Saudi Arabia Crown Prince Mohammed bin Salman sawiseltu langsar tak a ni a, tun thla ni hnih khan Turkey khawpui Istanbul-a Saudi Consulate dawr tura a kal chu a chin hriat a ni zui ta lo a ni. Saudi Arabia hian a chin an hriat bik loh thu vawi eng emaw zat an sawi hnuah, Consulate chhunga buaina chhuakah a thih thu an sawi leh a, Turkey chuan phuba lak duhna avanga thah a nih thu leh a taksa pawh chan sawm a nih thu te leh a finfiahna pawh an neih thu a sawi a ni. Khashoggi thih dan hi khawvel ram hrang hrangin an sawisel nasa hle a, a thahnaa inhnamhnawiha ngaih mi 18 chu Turkey-in an chungthu ngaihtuah tura an rama thawn a phut a, mahse Saudi Arabia erawh chuan heng mite hi an ram khua leh tui nihna nei an nih piah lamah, an rama chhui an nih bawk avangin, an chungthu pawh an ram chhunga ngaihtuah a nih tur thu an sawi ve thung a ni.
