He ni hmanna Aizawl Press Club-a neih hi MJA President, Pu Zonunsanga Khiangte-in a hmanpui a, record a\anga a lan danin hmarchhak biala mahni intihlum tam lama Mizoram pathumna a ni chu thil \ha lo tak a ni tih sawiin, kristian state ni chunga mahni intihlum engemawzat an awm \hin chu a chhan zirchian a \ul hle a ni, a ti. Mizorama mahni intihlum tam lam zaa 11.7 chu All India Suicide Rate zaa 10.6 aiin a sang zawk nia sawiin, inenfiah a \ul hle a ni, a ti. Pu Zonunsanga Khiangte chuan, Mizorama Depression nei nia insawi tam tak chu a lanchhuah dan a mak hle tih sawiin, mi \henkhat chu ruihhthei thil an tih laiin Depression nei angin an awm \hin a, an ruih loh hnuah an Depression chu a bo leh mai \hin a, hetianga Depression nei nia inngaite chanchin chu chhui chian lehzual a, an rilru puthmang hrechhuak tura \anlak a \ul hle tih a sawi.
Kulikawn damdawi in-a Psychiatry Department Head, Dr C. Lalhrekima chuan, mithiamte chhut danin kumtin mi nuai 8 vel mahni intihlum an awm ziah nia hriat a ni a, Mizoramah pawh mahni intihhlum tum leh intihlum engemawzat an awm \hin a, heng mite chhanchhuak tur hian mi tinin mawhphurhna leh \angkaina an nei tih an hriat a ngai a ni, a ti. Dr C Lalhrekima chuan mahni intihhlum hial duh khawpa awmte chhanchhuak tur hian mithiam bik nih a ngai lova, sawi tur bik pawh a awm chuang lo a, an mahni ngaihsakna lantir a, an thusawi ngaihthlak sak chu an tan damdawi \ha tak a tling a, minute 1 chhung lek ngaihsakna lantirin nunna a chhan thei tih hriat a pawimawh tih a sawi. Dr C. Lalhrekima chuan, \um khat mahni intihhlum tum tawh chuan an sim duh tih Mizoten an sawi \hin chu thu dik lo a ni tih an finfiah tawh tih a sawi a, mahni intihhlum tum zingah \um 2/3 lo tum tawhte pawh an awm nual tih a sawi.
He inkhawm hi National Health Mission Director, Dr. Lalrozama’n a kaihruai a, Aizawl Civil Hospital-a Clinical Psychologist, Dr. Lalengmawii’n Kulikawn Psychiatry Ward-a damlo enkawl tawhte dinhmun an zirchianna leh mahni intihhlum tumte tum chhan an zirchianna Report a sawifiah a. National Mental Health Programme State Nodal Officer, Dr. Robert L. Khawlhring chuan, rilru lama harsatna nei tan Phone No – 9366181946, 9366193094 leh 9366191341-ah engtiklai pawh biak pawh reng theih an ni thu a sawi a. Heng \anpuina diltute tan hian an hming leh veng tarlan kher a ngai lova, an thusawi leh harsatna an tawh dan pawh midang hriat loh tura him taka vawn \hat a ni dawn tih sawiin, kumin Mizoramah hmeichhia aia mipa mahni intihlum an tam ziah avangin mipa zinga rilru lam harsatna nei chu inti pa lova, an harsatna sawichhuak tura a duh thu a sawi.
Kumin World Suicide Prevention Day-ah hian thupui atan ‘mahni intihlum veng tura a huhova \anlak, Working Together to Prevent Suicide’ tih hman a ni.
