Assembly Speaker hlui Pu R. Lalawia hi kum 1941 khan Sialhawk khuaah a lo piang a, kum 1967-ah Aizawlah pemin, Mizorama Ist Class Contractor hmasa ber a ni. Kum 1984-ah UT hun laiin Khawhai bial a\angin Independent-in MLA ah thlan tlin a ni a, kum 1987-a State puitlinga Mizoram hlankai a nih khan MNF Ticket-in Khawhai bialah bawk thlan tlin leh a ni. Kum 1988-ah North Vanlaiphai a\angin thlan tlin a ni a, Speaker atan ruat a ni. Pu R. Lalawia hian zunthlum natna avangin hun engemawchen harsatna a tawk a, kumin March ni 27 zing lam dar 3 khan a thi a ni.
Vawiina sun tho Goa Chief Minister hlui, Pu Manohar Parrikar hi kum 1955 khan Goa-ah a piang a. |um 4 Goa Chief Minister a nih bakah, Union Defence Minister pawh lo ni tawh a ni a. Kumin March ni 17 khan Cancer vangin a thi a ni.
An mahni sunna thu sawitu House Leader, Pu Zoramthanga chuan, Speaker hlui Pu R. Lalawia chu House member satliah ni mai lova Speaker nia hun rei tak House lo kaihruai tawhtu a ni tih sawiin, hun lo taka a boral ta chu an ui takzet tih a sawi a. A kalsan tak a nupui fanaute chu Pathianin a awmpui a beisei tih a sawi. Goa Chief Minister hlui, Pu Manohar Parrikar chu Goa Chief Minister a nih piah lamah Union Defence Minister pawh lo ni tawh a ni tih sawiin, Pu Zoramthanga chuan, Goa mipui zinga chhuanawm berte zing a mi a ni, a ti a. A thihna chu Goa mai ni lo India ram tan channa nasa tak a ni, a ti.
Oppostion Group Leader, Pu Lalduhoma pawhin, State Chief Minister bakah Union Minister hial ni thei Pu Manohar Parrikar chu a ui thu a sawi a. Speaker hlui, Pu R. Lalawia chu a \hian hnai tak Politics a luhchilh dawna thutawp siampuitu awmchhun a ni tih sawiin, ZNP-ah Vice President hial ni mah se, hrisel lohna avangin a chhunzawm thei ta lo a ni, a ti a. Pu R. Lalawia sun a nih rual hian Mizoram tana a hmathlir Autonomous District Council hnuaia Mizoram pum dah let leh chu ram leh hnam tan a \ha zawk em tih ngaihtuah chian a \ul hle a ni, a ti a. A kaihhruai \hin Assembly House-ah amah sun a ngai ta chu pawi a tih thu sawiin, a chhungte Pathianin a awmpui zel a beisei tih Pu Lalduhoma chuan a sawi.
Congress Group Leader, Pu Zodintluanga pawhin Speaker hlui, Pu R. Lalawia chu \hangtharte tan entawn tur hnuhchhiahtu mi pawimawh a ni, a ti a. Lehkha thiam sang pawh ni lovin hniam takin bul a \an a, a tumruhna leh taihmakna avangin Mizorama pa hausa berte zinga mi a ni thei chu \hangtharten entawn se a duh thu a sawi.
Home Minister, tun hmaa Assembly Speaker lo ni tawh \hin Pu Lalchamliana pawhin, Pu R. Lalawia chu Assembbly \hutkhawmnaa thil thar tam tak ching chhuaktu a ni tih a sawi a. A kaihhruaina hnuaiah Session \an dawn a piangin Kohhran hrang hrang hruaitute nen hunserh an hmang \hin a. Danin a phal angin a hun lai khan Mizo \awng chu House-ah Official Language-ah hman a ni a, Session \an dawnah Aizawla awm sa chunga MLA ten an bial a\anga kal anga TA/DA an Bill \hin chu dik lo a tih avangin tihtawp a ni tih a sawi a, Mizoram tana thil \ha tam tak a tihte chu hriatreng a ni tawh dawn a ni, a ti.
Pu R. Lalawia leh Pu Manohar Parrikar-te sunnaah hian BJP MLA, Dr. BD Chakma, Congress member, Pu KT Rokhaw leh MNF member, Dr. ZR Thiamsanga pawhin an ui thu an sawi a, hemi hnu hian Speaker, Pu Lalrinliana Sailo kaihhruaina-in an mahni sun nan member-te chu ngawi rengin Minute khat chhung an ding a ni.
