Resolution putluh paha thusawiin, Pu Zothantluanga chuan, MNF party chuan inkalpawhna kawngpui chu a ngai pawimawh a, kum 10 kaltaa an sorkar hmasak \um pawh khan kawng thar tam tak an sial bakah kawngpui awm sate pawh \ha takin an enkawl a, eptu lama an \an hnuah pawh kawngpui \ha a awm theih nan an theih ang angin hma an la chhunzawm zel a ni, a ti a. MNF sorkar a tlak hnuah Mizoram hmun hrang hranga kawngpuite chu a chhe hle a, fur lai chauh ni lo, \hal lai pawha kawngpui a \hat theih tak reng reng loh avangin MNF Party chuan kawngpui \ha awm theih nan an theih ang angin hma an la a, Total Bandh te huaihawtin, kawngte an zawh hial a ni a ti a. Kum 2014 November 21-ah khan khatih laia MNF MLA, Dr. K. beichhua chuan Mizorama kawngpui chhe lutuk chu chak zawka siam a nih theih nan sorkar-in hmala rawh se tih Private Member Resolution a pulut hial a, hei hi sawi ho a nih hnuah rorel lai Congress member-te chuan an hnawl sak a. Kum 2015 October nbi 16-ah khatih laia MNF Group Leader, Pu Vanlalzawma’n Resolution siam lehin, Mizorama inkal pawhna kawngpui chhe nasa chu mipuite tan harsatna thlen tu a nih avangin siam \hat ni rawh se tih a put luh leh nikum March ni 16-a MNF member, Pu K. Sang\huama’n kawngpui siam tura Private member Resolution a puh luh pawh hnawl sak an ni, a ti.
Pu Zothantluanga chuan, sorkar hmasa hun laia kawngpui chhiat zia chu sawi ngai lovin a hretu chu mipuite an ni a ti a, tuna MNF kaihhruai sorkar thar pian hnu thla 4/5 chhung leka kawngpui an siam\ha nghal mai chu thil lawmawm tak a ni tih sawiin, hemi atan lawmthu sawina Resolution a puh luh chu lungrual taka pawmpui turin member -te a sawm a ni.
He Resolution sawi honaah hian member \hanem takin thu an sawi a, Congress member-te chuan an sorkar chhung khan kawngpui chu a chhe reng bik lo tih sawiin, kawng siam tam tak an neih thu an sawi a. Hmun tam zawka kawng chhia nia sawite chu a \hat zawkna tura laih zauh a nih vanga chhia a ni tih sawiin, Congress sorkar chuan a theih chin chinah kawngpui \ha nei turin hma a la tih an sawi hlawm.
Sawi hona khaikhawmtu Chief Minister, Pu Zoramthanga chuan, Sorkar hmasa-in kawngpui a ngaihthah leh ngaihthah loh chungchanga thutlukna siam tur chu House ni lovin, Mizoram mipuite an ni, a ti a. Inthlan dawna an au hla pui ber chu kawngpui chhia leh zu chungchang a ni tih sawiin, hei hian thil awm dan a hril chiang hle nia a hriat thu a sawi. Pu Zoramthanga chuan, thuneihna an chan ve leh Congress sorkar sum hman ban hmangin kawngpui siam nghal a ni tih sawiin, thil reng reng kalpui a nih dawna pawimawh ber chu ngaihtuahna a ni a, MNF sorkar chuan kawngpui \ha neih chu a ngaihtuahnaah a dah tlat avangin thla 4/5 chhung lekin Congress sorkar-in a tih theih loh Mizoram hmun hrang hranga kawngpuite chu an siam \ha nghal mai niin a sawi.
Hemi hnu hian Speaker, Pu Lalrinliana Sailo kaihhruaiin member-te chuan Pu Zothantluanga Resolution puhluh, “MNF Ministry-in hun rei lote chhunga Zoram dung leh vanga kawng chhe tak a siam\ha mai hi lawmawm kan tih hle” tih chu loungrual takin an pawm zui a ni.
Inrinni leh Pathianni te chawlhsan a nih hnuah Budget Session hi karleh thawh\anniah chhunzawm a ni ang a, Minister pathum, Pu Lalchamliana, Pu Lalchhandama Ralte leh Pu TJ Lalnuntluanga ten an Department chan an enkawlna tur sum ruahmante sawi hova Pass tum a ni ang.
