Inkhawm hi Vairengte Civil SDO in a kairhruaia, Pu Lalrinsanga Ralte chuan, Vairengte in Multipurpose Hall an neihna tura khawtlang mipui tanrualna chu fakawm a tih thu a sawi a, Chief Minister Pu Zoramthanga kaihhruai sorkarin thingtlang tih hmasawnna turin theihtawp a chhuah a, Kut hnathawktute chawisanna turin SEDP hnuaiah tum a ni a, thingtlang leh khawpui hmasawnna inthlau nasa lutuk chu rualkhai zawka a kal theih nan sorkarin hma a la a ni a ti. Pu Rinsanga hian MNF sorkarah ramri ngaihpawimawh a nih thu a sawi a, a venhimna atan ramri depa awm khaw hrang hrangah nasa zawkin hmasawnna a kalpui a ni a ti a, Vairengte pawh ngaihpawimawh a ni a, Fire Sub-station te dah a nih bakah, mitthi ruang dahna tur Morgue House te pawh sak a ni a, Academic Session thar atangin Higher Secondary School-ah Science zirna hawn tum a ni a ti a, BRTF hmun hluia IR police te awmna chu a hmunhma cheithat tum a ni a ti bawk.
