Uttar Pradesh-a damdawi in pakhatah ni nga chhungin naupang 60 an thi a, a chhan chiang taka sawi theih a la ni lo. Naupangte hi Gorakhpur-a Baba Raghav Das Medical College damdawiin-a oxygen bur tlakchham avanga thi nia sawi an ni a, he damdawiina oxygen bur enkawltute chuan ningani khan Chief Medical Officer hnenah oxygen an neih tlem thu hi an hriattir tawh tih an sawi a, Lucknow-a oxygen an leina thinte dap a nih hnuah, a hmaa oxygen an lakna man, cheng nuai 70 vel an la pek fel loh avangin bur thar an la pe lo a ni tih hriat a ni a, hemi hnu hian Faizabad atangin oxygen bur 300 an lei tih hriat a ni bawk. Damdawi in hotute chhinchhiah dan chuan tun kar Thawhtanni khan naupang 9, Thawhlehni-ah 12, Ningani-ah 23, nimin, Zirtawpni khan naupang 7 an thi a ni. Gorakhpur District Bawrhsap, Rajeev Rautela chuan he damdawiin-in oxygen bur, hmun dang atanga a lei avang hian naupangte hi oxygen tlakchham avanga thi ni lovin, an natna avanga thi niin a sawi a, UP sorkar hotute pawhin damlote ngaihthah avang ni zawka an hriat thu leh, chhui chian a nih tur thu an sawi a ni. Gorakhpur damdawi in hi Nilaini khan state CM, Yogi Adityanath chuan a tlawh a, oxygen an tlachham tih hi an lo hriattir lo niin state Health minister, Siddharth Nath Singh chuan a sawi a, eptu pawl hrang hrangte chuan Siddharth Nath hi bang turin an phut nasa hle a, Congress hruaitu, Pi Sonia Gandhi pawhin he thil thleng hian a rilru a tihnat thu sawiin, BJP thiam loh niin a sawi a ni.
Gorakhpur hi state CM, Yogi Adityanath-a te khua a ni a, Deputy CM, Keshav Prasad Maurya chuan he sorkar damdawi in, Baba Raghav Das Medical College-a thil thlenga mawhphurtute chu na taka hrem a tiam a ni. Chief Medical Superintendent, R.S. Shukla chuan naupangte hi oxygen tlakchham avanga thi ni lovin a sawi a, an zinga 10 chu thluaka khawsik lut chi khat avanga thi nia sawiin, a dangte chu an pianto fuh loh avanga thi niin a sawi. ABP News chuan, Dist. Bawrhsapte hian thil pawimawha hman tur, cheng vbc. za vel an neih avangin, oxygen man bat hi chhuanlam a tling lo niin a sawi.
