Uttar Pradesh damdawi ina naupang 60 chuang thih vangin Additional Chief Secretary ban

Uttar Pradesh-a Gorakhpur damdawi ina ni 5 chhunga naupang 60 chuang an thih chungchang chhuina kal zelah, state sorkarin Medical Education dept. changtu, Additional Chief Secretary, Anita Bhatnagar Jain-i chu a ban a, Chief Secretary, Rajeev Kumar-a’n nizana CM hnena he thil thlen dan report a thehluh hnuah sorkarin Pi Jain-i hi a ban ta nia hriat a ni a, he report-ah hian Gorakhpur-a BRD Medical College Hospital-a vanduaina thlengah khan sorkar mi pawimawh parukin mawh an phur nia ziah lan a ni a, heng zingah hian Pi Jain-i pawh hi a tel a ni. Sorkar hotute chuan, oxygen zuartute laka sorkar leiba chu Addl. Chief Secy. hian a rulh lawk duh loh avangin a zuartute hian lak belh an phal tawh lova, damdawi in hian a tuar ta niin an sawi a, hemi chungchang chhui chiangtu committee chuan damdawi in hotu eng emaw zat pawh hrem a tum nia hriat a ni a, heng zingah hian he thil thleng avanga chawlh lailawk tir, BRD Medical College Principal Dr Rajeev Mishra-a leh a nupui, Dr Poornima Shukla-i te pawh an tel a, an lakah hian FIR thehluh thuai a ni dawn nia sawi a ni bawk. BRD Medical College Principal leh a nupui hi an bibo mek nia hriat a ni a, puan tawh angin, state CM, Yogi Adityanath-a chuan he thilah hian tumah a zuah dawn lo tih sawiin, mawhphurtute chu na taka hrem an nih tur thu a lo sawi tawh a ni.