Uttar Pradesh Aligarh mitthi dahna pawnah ruang pakhat hnutchhiah, khawlai ui-in an ei lai thlalak chu nasa takin a darh

Uttar Pradesh Aligarh mitthi dahna pawnah ruang pakhat hnutchhiah, khawlai ui-in an ei lai thlalak chu nasa takin a darh a, mipui thin a \hawng hle. Aligarh-a Chief Medical Officer Dr ML Agarwal chuan tunge a nih hriat loh mitthi ruang pakhat khawlai ui-in an ei tih hi an hriat rualin, pawi an ti hle tih a sawi a, hetiang thil thleng hi mihring mihrinna kalh a nih avangin a mawhphurtute chu hrem ngei an ni ang a ti. Post mortem-na hmuna thawk Pharmacist pahnih chu suspend nghal an ni a, uiin mitthi ruang an ei lai, mobile phone hmanga video-a thlalatu hi hriat chhuah a la ni lo a ni. Hetiang thil hi Uttar Pradesh ah a thlen vawi khatna a ni tawh lo a, nikum lam khan Lucknow Ram Manohar Lohia Hospital mitthi dahna in bulah nu pakhat ruang, ven loha dah chu khawlai ui-in an lo ei tawh bawk a, he hmeichhia hi tur in avanga damdawiin-a hruai a nih hnuah a thi a, mitthi dahna hmuna zawn luh a ni a, a tuka a ruang hlawm tumtu a chhungte chuan a lu ruh thenkhat a bo tih an sawi. Khami \um pawh khan mitthi dahna ina thawk mi pathum chu ban an ni a, hmeichhe pasal in thubuai a putluh zui avangin sorkar hotu lian tak takte pawhin ngaihdam an lo dil tawh a ni.