Uttar Pradesh-a MLA in a pawngsual nia sawi, tleirawl pakhat, a chuanna car motor lian pakhatin na taka a sut avanga Lucknow damdawiin-a enkawl mek chu Delhi-a sawn tur leh tur loh Supreme Court in a ngaihtuah a., a chhungten Delhi-a sawn \ul an tih loh avangin Lucknow-a enkawl rih a ni ang.

July ni 28 khan he tleirawl leh a ukil bakah a chhungte dang chuanna car chu Rae Bareli ah truck pakhatin na takin a su a, hmeichhe pahnih an thi a, tleirawl leh a ukil chuan hliam na tak an tuar a ni. Supreme Court-a ngaihtuahnaah hian tleirawl nu hian Lucknow-a enkawl chu a tawk rih nia a hriat thu a sawi avangin Supreme Court chuan New Delhi AIIMS-a sawn leh sawn loh chu a chhungte thu a ni a ti a, tun dinhmunah chuan pawngsual tawktu tleirawl hriselna dinhmun chu court in a ngaih pawimawh hmasak a ni tih Chief Justice Ranjan Gogoi chuan a sawi.

Supreme Court hian pawngsual tawktu hmeichhe tleirawl nihna leh a hming puangzar lo turin chanchinbumite leh TV news lam te a hriattir nghal a, he tleirawl interview hlui tawh chu TV channel \henkhatah tih chhuah nia sawi a awm a ni.

Thubuai chhuitu CBI chuan pawngsualtua puh Kuldeep Sengar chu thuzawhfiah tura kawl an dil dawn a, Raebareli pawh hi tlawhin finfiahna awm theite an la khawm leh dawn a ni.