Senate in budget thar a pass theih tak loh avangin US Sorkar inrelbawlna peng hrang hrangte chu khar hmabakin an awm.
February ni 16 thlenga Sorkar sum hman tur hi hun biktuk chhunga pass theih a ni ta lo a, sum hman tur Appropriation bill hi Congress in a pass hnuah nizan zanlai thlen hma ngei khan President Donald Trump-an hming a ziah hna a tul a, Bill pass tur hian Senate ah vote 60 tal hmuh a tul laiin, a thlawptu lamah vote 50 leh a thlawp lo tu lamah vote 49 a tla a, bill hi a tlang zawh tak loh avangin, US sorkar inrelbawlna peng hrang hrangte chu khar an tul dawn ta a ni.
Democrats leh Republican party te inrem theih lohna ber hi ram dang atanga kum tlin hmaa US-a pem lut, mi 700,000 zette chungthu-ah a ni a, heng mi, ‘Dreamers’ tia sawite hi Democrats lam chuan US atanga thawn chhuah an duh lo a, President hlui Barack Obama khan heng mite’n dan hnuaia humhalh lailawkna an dawn theihna tur, Programme pakhat a duang a. September thla khan President Trump-a chuan he programme hi a ti tawp dawn tih puangin, March thla ral hma ngeia a thlakna tur ruahmanna dang siam turin Congress chu a lo hrilh tawh a. President Trump a hian ramri venhim kawngah khauh zawka kal tumin sum leh pai tam zawk dah a duh a ni.
White House thupuangtu, Sarah Sanders chuan Democrats lam chu ram himna chungchang leh naupangte hamthatna turte aia Politics thil dah lian zawkah a puh a. Democratic Senate hruaitu, Chuck Schumer thung chuan President Donald Trump a chu party pahnihte inremna hnawlah a puh ve thung.
US hian hetiang harsatna, Federal Shutdown tia sawi hi tum engemawzat a lo tawng tawh a, kum 2013 khan ni 16 chhung Shut Down hi neih a ni a, hnathawktu tam tak chu hlawh nei lovin an hna atanga chawlh lak luih tir an ni a, vantlang hmun pawimawh leh park ang chi te pawh khar an ni.
Tun tumah pawh hian Dept hrang hrang zatve zet chuan hna an thawk thei dawn lo tih US Defence Secretary Jim Mattis chuan a sawi a. Congress ah inremna a awm theih hma chuan hnathawktu mi 850,000 vel zette chu hlawh nei lova chawlh lak luih tir an tul leh dawn niin American Federation of Government Employes chuan an chhut a ni. Federal Shutdown hi President Donald Trumpa’n Office a luah tan atanga kum khat tlinna chiahah a thleng a ni.
