US Secretary of State, Rex Tillerson thlak a ni dawn nia hriat a ni

US Secretary of State, Rex Tillerson-a chu thlak a ni dawn nia hriat a ni a, thu lian tak tak – North Korea leh Iran chungchangah te leh thil dangah President Donald Trump-a rin a hlawh tawh lo nia hriat a ni a, White House pawhin a palzut nual tawh nia hriat a ni. Niminah pawh khan, India ram a\anga Ivanka Trump-i’n Washington a pan laiin, Tillerson-a hi chawlhtir a ni dawn tih thawm a awm a, New York Times leh Washington Post pawhin rei vak lovah Tillerson hi CIA Director, Mike Pompeo-a’n a thlak dawn niin an sawi. CIA Director thar atan hian Senator Tom Cotton ruat a ni dawn nia hriat a ni a, Attorney General, Jeff Sessions erawh chu President Trump-a’n ngaina lo deuhin lang mah se, a hna a la chelh dawn nia sawi a ni. Ivanka Trump-i’n tun hnaia India a rawn tlawh chungchangah pawh, State Department-in a tih tur a ti tawk lo nia sawi a ni a, Tillerson-a hian dem a kai deuh a ni. A dinhmun hi derthawng hle tawh mah se, Tillerson-a hian a tih tur a la ti zel a, German Foreign Minister, Sigmar Gabriel leh Macedonia Foreign Minister, Nikola Dimitrov nen pawh nimin lawk thleng khan an la inkawm a ni. Tillerson-a hi chawlhtir a nih chuan Defense Secretary, James Mattis leh Treasury Secretary, Steve Mnuchin pawh an bang ve mai thei nia sawi a ni bawk.