US secretary of State Mike Pompe a’n North Korea nena nuclear ralthuam chungchanga inremna bawhzui turin Washington a chhuahsan a, Pyongyang ah Kim Jong Un a hmu ang.
Washington-a sorkar hotu pawimawh ber leh President thachhangdawltu hian naktukah Pyongyang hi a thleng ang a, zan khat a ruak ang. President Donald Trump-a chuan thla hlui khan Singapore ah Kim Jong un a lo kawm tawh a, khami \um khan North Korea lakah nuclear ralthuam chungchangah thil hlauhawm a awm ta lo tih a lo sawi tawh a, amaherawhchu khami \uma ram pahnih hruaituten inremna an ziah chu a tawiin, a kimchang lo hle a, North Korea in a nuclear ralthuam a tih ral vek theihna turin Pompeo hian tih tur \ul te a bawhzui dawn nia hriat a ni. Hmabak tih tur la awm zingah hian Kim Jong un-an nuclear ralthuam a neih dan puanzar te, nuclear ralthuam nuai bo tura hunbi tiam neia hmalak chhoh dan tur chinfel te, North Korea hmalak dan enfiah chhoh zel dan turte a tel a ni. Washington chuan hmalakna hi kum khat chhunga zawhfel theih a beisei thu sawi mahse, thil chinchang hria te chuan Kim Jong Un hian chuti maia chet a lak an rin loh thu leh kum tam tak chhung hun a duh an rin thu an sawi ve thung a, hetihlai hian Trump leh Pompeo te hian North Korea in nuclear ralthuam a tih tawp kim vek hma chuan sum leh paia hrekna hlih a nih loh tur thu an sawi chiang ve bawk.
