US president thlannaah Russia a inrawlh nia sawi thubuai chhuitu Special Counsel chu ban tir tumna a awm nia sawiin Democrat Party hruaitute chuan President Trump-a chu fimkhur turin an vaukhan. Democrat hruaitute hian hetianga Special Counsel hi ban tir anih chuan US ram danpui bawhchhiatna a thleng dawn a ni an ti a. US house Intelligence Committee-a Republican te Memorandum chu nimin khan President remtihnaa tlangzarh a ni a, he lehkhaah hian FBI te chu an thuneihna hmang suala puh an ni a, President Trump-a chuan Memo-ah hian chanchin zahpuiawm tak tak a inziak a ni a ti. Memo ah hian FBI leh Justice Dept te chu Campaign laia thu belhchian dawl lo leh phuah chawp hmanga Trump-a lamhnaite enthlak remtihna laa puh an ni a. Memo tlangzarh tak hi Democrat lam chuan Campaign laia Russia inrawlh dan chhui chian mek tih bahlah tumna a ni an ti a. President Trump-a chuan Campaign laia Russia nena inthuruala thil tia puh a nihna hi thu dik lo a ni a ti thung. Senate Minority Leader Chuck Schumer, House Minority Nancy Pelosi leh Democrat hruaitu dang 8 te chuan he buaina kal zelah hian Trump-a chu Special Counsel Robert Mueller emaw, Deputy Attorney General Rod Rosenstein te emaw ban tir lo turin an vaukhan a, a ban tir anih chuan President thlanna-a Russia inrawlh dan chhui mekna tih bahlah tumnaa an ngaih tur thu leh, ram danpui bawhchhiatna a nih tur thu te ziakin President hi an hrilh a ni. White House erawh chuan Department of Justice ah thil tih danglam tumna a awm loh thu leh Rosenstain pawhin a hna tluang taka a thawh zui tur thu a sawi thung.
Chanchin Thar US president thlannaah Russia a inrawlh nia sawi thubuai chhuitu Special Counsel...
