Iran chuan drone bo an neih leh neih loh hriattirna an dawng lo tih a sawi ve thung a ni. June thla khan Iran-in US military drone an lo kapthla tawh a, hemi hmalam hian Iran-in tuialhthei phur lawng leh lawng hna thawk mi 12, tuialhthei tawlhruk tum an man tih an sawi ve bawk.
May thlaa Iran-in tuialhthei phur lawng an beihna hmun chu khawvel ram hrang hrangte insumdawntawnna hmun pawimawh tak a nih avangin US-in Iran chu na takin a dem a, amaherawhchu, heng puhna zawng zawngte hi Iran chuan a pha vek thung a ni.
White House-a thu a sawinaah Trump chuan Hormuz-a thil thleng chungchang a sawi a, Boxer lawng hnai chilh takin Iran drone chu a thlawk kual a, lawng hnathawkte chu ralthuam chelek lo tura hriattir nimahsela, drone chu a thlawh sawn duh loh avangin loh theih lohin ralthuam hmanga drone chu tihchhiat a ngai ta niin a sawi.
Trump chuan he thil thleng hi tuipuia Iran laka inr<nna leh inhalna thil tih thleng hnai vai ber a ni a ti a, United States-in a ram mite dikna leh a bungruate leh a thil neih hlut te venhim chu a tih tur dik tak a ni a ti bawk.
Hetihlai hian Iran thuneitute chuan US statement chu a hnawl ve thung a, Deputy Foreign Minister, Abbas Araqchi chuan twitter-ah drone hloh an neih loh thu leh US-in tihpalh thil thu-in ama drone ngei a kap thla niin a ziak a ni.
