US President Donald Trump-a’n Mexico nena an inrina hung a tum dodalna avangin US sorkar office \henkhat chu hapta tharah pawh hnathawk mumal thei lovin an la awm chhunzawm dawn niin a lang.

US rorelna in sang pahnihte chu nimin khan hun rei lote chhung an \hukhawmin thutlukna mumal an nei lo a, Thawh\anni khian an \hukhawm chhunzawm leh dawn a, hetihlai hian Senate member tam tak chu Krismas chawlh an hman avangin Washington ah an la let rih lo a ni. Mexico ramri hungna tura sum ruahman hi pass mai theih anih loh avangin US sorkar hnuaia office tam tak chu hnathawk mumal thei lova khar a ni a, President Donald Trump-a chuan dan kalha US a pemlutte danna tura ramri hung a tum hi engtikawng maha hnuhlet a tum lo tih a sawi. Hetihlai hian a khingpuite chuan Trump-a hi ramri chungchang hluhlang taka sawi-a politics-a ham\hatna lakna atana hman tumah an puh thung a, ramri hung kher lo pawhin ramri venhim dan \ha zawk a awm a ni an ti thung.