United States sorkarin ruahmanna a siam “Operation Warp Speed” tum ber pakhat chu kumin kum tawpa coronavirus vaccine chi 1 emaw, aia tam emaw hman theih tura siamchhuah a ni tih thuneitute chuan an sawi.
President, Donald Trump chuan Vaccine an neih vat an inring tih news conference-ah a sawi a, mi thiamten thla 18 chhung tal siam ngai an tih vaccine chu engtin nge rang taka an siam theih tih zawhna chu chhangin kumin January atangin an lo buaipui tawh tih a sawi.
Health and Human Services Secretary Alex Azar chuan Vaccine candidate 100 vel awm tawhin, chungte chu ti tlem lehin a tha zual chi khat emaw, aia tam emaw, him leh rintlak tam tham tak kumin kum tawpah chuan an siamchhuah hman a beisei tih a sawi.
Johns Hopkins University chhut danin US-ah hian nimin thleng khan COVID-19 vang hian mi 86,000 an thi tawh a, mi 14,20,000 chuangin an kai tawh a ni.
